KRALENDIJK – Radio Live 99.9 FM a papia ku Sekretario di estado Tamara van Ark na Rincon awe mainta, unda el a papia riba diferente punto ku Aimed Ayubi durante e programa Brunch99. El a bisa: “Sali dilanti ku bo prekupashon i tin hende pa yudabo. Awor ta di 3 bia ku mi ta bishita Boneiru i e bia aki mi a sinta ku diferente grupo i pa atendé tokante ‘Dialogo Sentral’. Mi ta pone hopi atenshon pa yuda i drecha e situashon di pobresa riba e isla. Mi a papia ku diferente persona i a tuma nota di e situashon pa loke ta trata pobresa i kon e hende ta atendé ku nan trabou. Bia pasa mi a topa diferente hende na Boneiru, kendenan ta orguyoso i ta habri pa papia apesar ku no ta agradabel pa papia tokante pobresa. E hendenan a habri nan kas p’ami haña un bista kla, kon e situashon ta. E Rapòrt di Ombudsman ta presentá e situashon bèrdat di e suidadano, i esaki ta rekerí atenshon pa solushoná. Huntu ku otro gruponan nos ta traha duru pa logra mehorá e situashon. Entre otro gastu di tur fin di luna mester baha pa evitá ku pobresa ta presentá. Hende ku no por traha pa motibu di un defisiensia, nos ke pa yuda nan ku un supsidio. E proseso ta kanando huntu ku e parti di akohida pa mucha, pa yuda esnan den nesesidat. Un persona ku no ta traha ta importante pa su yu tin bon guia i tin kuminda tur dia. Ta trata pa bai baha gastu asina e suidadano su kosnan di paga mensual ta abou i nan por sobra sèn.  Tambe e parti di salario mínimo. Mas ku 90 porshento di komunidat ta gana mas ku salario mínimo. Loke ta hopi bon. Di otro banda mester wak bon pa no hisa e salario mínimo hopi haltu, i pone ku e doño di trabou no por kontinuá ku su negoshi. Nos ke huntu drecha e bida di e boneriano hasié mihó. Tokante ‘Bestuursakkoord’ mi ta mira ku tin un kos positivo, unda ta bai baha gastu di hür i mas loke ta bai yuda pa tur hende por sobrebibí stabil. Ta bisto ku e loke e hende mester paga ta haltu, pues nan por paga i keda stabil si e gastunan ta mas abou. Esei ta loke nos ta trahando duru huntu ku gobièrnu di Boneiru pa logr’é. Mi ta kontentu na Boneiru, kon habri e hende ta pa papia ekspresá nan prekupashon. No tene bèrguensa i ekspresá si bo ta pasa den momentunan fastioso pa nos huntu yudabo, ”sekretario di estado van Ark a menshoná.

Diputado Nina den Heyer kende tabata huntu ku sekretario di estado van Ark, a sigui papia.

“Mi tabata na Hulanda resientemente i a atendé diferente tópiko entre otro pa nos studiantenan. Awor na Boneiru e dianan aki nos a papia ku e sekretario di estado van Ark tokante nos grandinan, kendenan no tin sufisiente kuminda i nan no por sali kas i mas. Nos huntu ku van Ark ta riba mes un liña pa asina yega na solushon pa e diferente situashon riba e isla.  Van Ark a sinta ku diferente grupo i kada grupo a papia ku van Ark e mes un situashon ku ta rekerí atenshon. Nos tin sigur ku e sekretario di estado tin atenshon i e ta bai yuda nos. E parti akohida pa mucha denter di poko ta bai bin kambio pa mehorashon. Nos ta kere e spit ku e tin, pa 2020 e akohida pa mucha ta bin un kambio pa alivio. E parti di preis di awa i elektrisidat, no ta den man di van Ark, sinembargo e ta bai pone preshon riba esnan konserní pa yega na bahamentu di gastu, loke ta duna speransa ku kos ta bai drech’é pronto. Pa loke ta trata salario mínimo e no ta sufisiente. Mester atendé pa wak kua medida por tuma. Meskos ta konta pa Saba i Sint Eustatius. Nos ta traha duru pa trese alivio pa pueblo. NO pèrdè speransa i aserka nos si bo tin kualke kos ku por kontribuí pa nos mehorá e situashon,”diputado den Heyer a konta Radio Live 99.9 FM awe mainta.  

Share This
error: Content is protected !!