Kon sigui ku AFBW

Despues di fayesimentu di Nilco Rollan, e delegadonan di e diferente kompanianan na unda AFBW tabatin representashon a reuní djaweps 3 di òktober 2019 ku asistensia di USIBO den persona di sekretario Norwin Willem pa dialogá i interkambiá ku otro i fiha posishon pa ku kontinuidat di e sindikato AFBW. E reunion por a konta tambe ku presensia di un di e fundadornan di AFBW sr. Ewald Abdul, kende su presensia a keda altamente apresiá. For di e reunion a sali e siguiente desishonnan:

  1. Di akuerdo ku statutonan di e sindikato lo organisá un Kongreso Ekstra-ordinario pa yena e direktiva aktual di AFBW.
  2. Pa organisá e kongreso a instalá un komishon konsistiendo di un representante di kada kompania.
  3. Awe djaluna e komishon lo reuní pa definí henter e organisashon di e kongreso aki, esta fecha, lugá i saka formulario di inskripshon.

Tambe a informá tur e delegadonan pa hasi esfuerso máksimo pa den kada kompania aktual si ta posibel tur e trahadónan afiliá nan mes na AFBW. Esfuerso tambe lo bai keda hasí pa organisá mas kompania aki na Boneiru. Tur esaki den un esfuerso pa kumpli ku deseo di defuntu Nilco Rollan. Pues un yamada ta bai na tur e empleadonan di Cargill, Bonaire Wegenmaatschappij, Fundashon Cas Boneriano i Fundashon Mariadal ku ainda no ta afiliá pa yena e formularionan di inskripshon ku den kurso di e tempu benidero e shopstewardnan lo repartí na boka di trabou. Trahadónan di otor kompanianan ku ainda no ta organisá sindikalmente aserká i afiliá boso mes. Tambe ta pidi miembronan pa inskribí pa un puesto den e direktiva aktual. Ku e posishonn firme i determinante aki di tur e delegadonan un señal a sali pa mustra ku AFBW t’ei pa keda i pa e sindikato sigui sali na defensa di e klase trahadó na Boneiru. Un lucha ku e sindikato a bin ta hiba for di su lantamentu dia 22 di novèmber 1966, pues ku pa 22 di novèmber awor AFBW lo kumpli 53 aña di eksistensia. USIBO kier felisitá e delegadonan pa nan determinashon pa tene memoria di e defuntu na haltu i nan determinashon pa sigui karga e bandera di AFBW na interes di e klase trahadó.

ABVO a firma CAO nobo ku Selibon

Djabièrnè 27 di sèptèmber 2019 ABVO a firma un CAO nobo pa e trahadónan di Selibon N.V. Un CAO kaminda e enfoke ta pa adelanto den kondishonnan di trabou pero hopi importante tambe un CAO pa konservá kuponan di trabou. Esaki por a dedusí for di e deklarashonnan di e presidente di ABVO, sr. Adri Williams kende a hasi un yamada fuerte na e trahadónan pa kuida e ekipo i material di e kompania pa asina evitá pa e próksimo añanan kualkier pensamentu den direkshon di bai outomatisá rekohementu di sushi. Un desishon asina lo ta funesto pa kuponan di trabou na Boneiru en general i trahadónan di Selibon en partikular. Trahadónan di Selibon tin den nan man pa evitá ku kuponan di trabou ta bai pèrdí na e empresa. Un pabien di parti di USIBO na tur e trahadónan di Selibon, pero tambe na direktiva di ABVO i nan shopstewardnan i tambe gerensia di SELIBON pa ku firmamento di un CAO nobo, ku ta un garantia pa trankilidat i seguridat laboral den e kompania.

Diálogo Sentral Ekstraordinario.

Dia 3 di òktober 2019 a tuma lugá un Diálogo Sentral ekstraordinario. Esaki relashoná ku bishita di sekretaria di estado Tamara van Ark di Asuntunan Sosial i di Labor. Djarason 2 di òktober 2019 USIBO a haña e oportunidat pa interkambiá informal ku e sekretaria di estado, den kual reunion nos a trese nos punto di bista dilanti. Por sierto esaki a sosodé tambe durante e enkuentro ofishal djaweps 3 di oktober 2019. Nos a pidi e sekretaria su atenshon speshal pa tene kuenta ku e loke ela stipulá den su nota komo punto di referensha pa e soshal minimo ta solamente un promé paso, ya ku e ta diferensha supstanshal for di e loke e rapòrt Regioplan i otro rapòrtnan a indiká ku e entrada minimo ku un trahadó mester pa e por kumpli ku su nesesidatnan básiko di tur luna. USIBO a duna e aserkamento di e sekretaria di estado benefisio di duda, ya ku ela duna di konosé formalmente ku e maneho ku e kier hiba ta na un banda oumentá e entrada, pero na e mesun momento na e otro un banda baha gastunan den diferente aria ku no ta solamente esnan ku e ta responsabel pe. Tambe ela duna di konosé ku e maneho aki lo ta uno struktural i lo no dependé di ken tin responsabilidat na e momento ei.

USIBO a pidi atenshon tambe pa oumento di e sueldo minimo ku no por ta igual ni mas abou ku e minimo soshal. E posishon aki e sekretaria di estado a konfirmá i hasta a poné den su karta pa Tweede Kamer. Desishon a kai ku lo bai hasi un investigashon pa wak ki espasio tin pa oumentá e sueldo i ta kuantu e mester ta. USIBO su punto di bista ta ku si ta bai bon ku Boneiru, manera ta keda ekspresá, esta turismo ta kresiendo, hopi trabou den konstrukshon,  hopi kompania nobo ta binestablesé na Boneiru, poblashon a bira dòbel, antó esaki ta nifiká ku tin prosperidat riba nos isla i ta un eksigensia ku tur hende ku a yuda konstruí e prosperidat aki, mester partisipá den un forma husto den dje pa asina alsa kalidat di bida i bienestar di nospueblo boneriano.

Na final di e seshonnan partidonan a firma un deklarashon di intenshon pa sigui traha strukturalmente ku otro pa alkansá e metanan ku a pone dilanti pa un desaroyo sohal-ekonómiko sano i balansá di Boneiru.

Dialogo Sentral regular

Den e siman aki lo tin e reunionnan di diàlogo sentral; regular riba djamars 8, djaweps 10 i si ta nesesario djaluna 14 di òktober 2019. Unn agènda pisá i yen pero manera bieunan ta bisa. Ora heru ta kayente mester strika.Temanan ku lo keda atendé ta entre otro Sentro di trabou, investigashon pa oumento di sueldo minimo, reakshon riba e kambio di lei pa awa i koriente, programa di gobernashon di e aktual koalishon, diskushon pa yega nan un Ákuerdo Amplio” entre tur e partnernan, asuntu di penshun obligatorio i loke bin mas na mesa. USIBO ta hopi satisfecho ku desaroyonan te awor den e Dialogo Sentral, kaminda tur partner ta serio i ta traha ku determinashon pa duna nan kontribushon na e dialogo. Nos di USIBO ta orguyoso di mira kon un inisativa ku nos a tuma na 2013 i ku apesar di tabatin su momentonan difisil den komienso for di november 2018 ora a reaktivá e plataforma aki, tin desishon i pasonan konkreto ku ta sali for di e dialogo ku un solo mira, bienestar di pueblo boneriano. Nos ta mira bentaha so ora sierto liñanan di maneho ta ser kargá ampliamente aki na Boneiru i ta pone ku Den Haag mester skucha. I no skucha so, pero kaminda ta nesesario kambia i adaptá nan posishon i tene kuenta ku loke ta biba den komunidat di Boneiru. Dialogá ke men tuma i duna. Pues no ta tur ora ta bo pensamento ta prevalesé. Pero sigur si ta ku tin desaroyo pa bon i nos no ta para ketu.

Share This
error: Content is protected !!