Kiko ta nifiká ku reunionnan di Konseho Insular no por tuma lugá pa motibu di falta di kuórem òf no tin grifir. Kiko ta nifiká ku e lei nobo di tráfiko no ta funshoná bon den su totalidat te ku mester duna pa sierto parti di e lei un periodo di grasia i ku e lei di hür tambe mester di revishon riba sierto punto. Ta bini aserka asuntunan di toubot, OTB, tuma dos periodista den servisio pa mantené i defendé e forma di proseder di Kolegio Ehekutivo i krea un imágen positivo den pueblo, investigashon na R&O, preguntanan di André Bosman miembro di parlamento hulandes tokante sènnan destiná pa agrikultura i servisio di komunikashon di Entidat Públiko Bonaire ku ta funshoná defisiente. Mi preguntanan ta: Kon e komunidat di Bonaire a kambia despues di 2004 i kon e komunidat ta influensiá komportashon di e abitantenan. Na 2004 mayoria di e votadónan a skohe pa Laso Direkto ku Hulanda i na 10-10-10 a bini repartishon di tarea entre Bonaire i Hulanda. Tin diferente lei nobo, tin kresementu rápido di e poblashon, tin dualismo, tin antagonismo entre boneriano i makamba i ocho konsehal a firma “Akuerdo di Atministrashon” ku a pone Bonaire su gobièrnu bou di kuratela. E kambionan aki, pa algun persona , sea individual òf den grupo, ta e base pa protestá. Protesta ku un toke nashonalista i den sierto kaso diskriminatorio i rasista tur a base di libertat di ekspreshon. Loke ta hala mi atenshon ta ekspreshonnan manera: Bonaire no tin lider, falta di liderazgo, Bonaire ta un repúblika di banana. Repúblika di banana ta nifiká un pais unda ta reina instabilidat polítiko i tin korupshon i soborno. Korupshon i soborno ta hasi daño na ekonomia i struktura demokrátiko i ta influensiá komportashon di habitantenan. Investigashon pa saka afó kiko ta stimulá korupshon i soborno ta nesesario i e kaminda apropiá pa kuminsá ta Konseho Insular. Pa ami e meta ta “Hunta nos ta forma un Bonaire sin korupshon”

Arthur Sealy

Share This
error: Content is protected !!