“SKY HIGH AVIATION KU PREIS ‘SKY HIGH’ PA DOMINIKANONAN NA BONEIRU”

0 Comment


KRALENDIJK – Un grupo di Dominikano bibá pa hopi aña na Boneiru for di repúblika dominikana a ekspresá nan mal kontentu ku e kompania di biahe “SKY High”. Segun nan ta un abusu loke e kompania ku semper nan a sostené ta hasi ku nan. “Un preis di abusu. “Nos ta pone komunidat kompletu na altura i tur Dominikano bibá na Boneiru. Sky High a kuminsá bula for di Boneiru pa Repúblika Dominikana i semper nos a sostené e kompania. Kos tabata bai bon. A inisiá buelo ku e preis di algu mas ku 300 dòler, despues 460 dòler a sigui subi yega 580 loke ainda tabata pagabel. Awor si no por mas! Nan ta papia awor di 795 dòler. Simplemente no por. Ta bisa mester kumpra pasashi trempan, sinembargo no tin diferensia si kumpr’é hopi dia adelantá òf otro manera. Simplemente mester paga 795 dòler. E preis aki ta sin e 20 dòler ku mester paga na Repúblika Dominikana pa regresá Boneiru. For di Kòrsou i Aruba pa Repúblika Dominikana, ta kosta hopi mas barata. Si un persona bula bai Kòrsou òf Aruba i biaha pa Repúblika Dominikana, ta salie sigur 200 piku dòler mas barata. No por komprondé dikon saliendo for di Boneiru e pasashi ta asina kostoso. E distansha no ta kambia hopi saliendo for di un di e otro islanan besiña. Djis pa kompará, KLM ta bula 9 ora Boneiru- Hulanda i vise vèrsá. Pa algu mas ku 600 dòler bo ta bula 18 ora i di Boneiru pa Repúblika Dominikana ta 2 ora di buelo total,”nan a konta Radio Live 99.9 FM. No mester gaña e servisio ta perfekto, sinembargo e preis pa bula ku SKY High Aviation ta “Sky High”. Riba Internèt por mira ku na Boneiru e ta karu i na Kòrsou i Aruba ta hopi mas barata bula ku e mes un kompania, mesun avion pa Repúblika Dominikana.”

Share This