MINISTERIO PÚBLIKO A SEPONÉ KASO DI JAMES FINIES KONDISHONALMENTE KU UN PERIODO DI PRUEBA DI UN AÑA.

0 Comment


KRALENDIJK – Durante selebrashon di Dia di Boneiru riba 6 di sèptèmber 2019 riba Plasa Wilhelmina, sr. James Finies a keda detené dor di agentenan di KPCN. Sr. Finies a pidi delantá pa pèrmit pa manifestá, pero no a mantené su mes na e instrukshon ku gezaghèber a indiká. E instrukshon nan tabata klaramente deskribí den e pèrmit ku a duné pa un manifestashon públiko. E mes a firma ku e la risibi esaki tambe. E por demonstrá na un lugá indiká riba Plasa Wilhelmina en frente di e podio. Riba e dia en kwestion e la bai demonstrá dilanti di ofisina di kolegio ehekutivo i no riba Plasa Wilhelmina pa motibu ku e no tabata di akuerdo ku e lugá indiká.

Pasombra e no a kumpli ku e indikashon, polis a demandé pa e bandoná e lugá dilanti di ofisina di kolegio ehekutivo. Na momento ku e no kier a kumpli ku esaki, e la keda detené. Durante di e detenshon e la resistí pasivo. Dor di a aktua asina, sr. Finies a hasi su mes kulpabel na dos echo kastigabel.

Pasombra sr. Finies a keda detené un par di ora na warda di polis i no a yega di haña su mes metí den problema ku polis i hustisia, Ministerio Públiko BES a disidí di seponé e kaso kondishonalmente ku un periodo di prueba di un aña. E kondishon aki ta ku durante di un aña e no mag kometé echonan kastigabel. Si e no kumpli ku esaki, lo presentá e kaso dilanti wes.

Share This