TREMENDO APERTURA TORNEO DI REINO DEN STADION ANTONIO TRENIDAT

0 Comment


KRALENDIJK – Djaluna último 7 òktober 2019 despues ku tur grupo a yega Boneiru djadumingu, a inisiá e parti ofisial i promé wega di futbòl relashoná ku ‘Torneo di Reino 2019’.

E parti ofisial a inisiá ku desfile di e delegashonnan di Hulanda, Boneiru, Kòrsou, Aruba i St. Maarten, ku a drenta Stadion Antonio Trenidad i subi tereno di wega ku nan bandera i bai para dilanti di e tribune di e dignitarionan ku tabata e invitadonan di honor.

Aki a sigui himno di diferente pais i islanan pa duna inisio na e seremonia ofisial. 

Hulanda, Boneiru, Kòrsou, Aruba i St. Maarten lo kompetí e siman aki ku otro den e deporte di futbòl, basketbòl i beisbòl.

E hóbennan den e kompetensianan ta di 12 pa 17 aña.

Seguidamente a dirigí palabra gezaghèber di Boneiru Edison Rijna. “Mi ta haña hopi sabi di boso pa partisipá na e weganan durante siman. Gosa di loke boso a bin pa hasi. Un persona ku no ta kontentu, sea ku trabou òf deporte, e no ta duna máksimo di loke e por.” Despues ku gezaghèber Rijna a papia el a deklará e ‘Torneo di Reino 2019’ habri.

Despues a dirigí algun palabra Prens Pieter Christiaan van Oranje – Nassau. El a menshoná entre otro ku ta un plaser pa e ta na Boneiru pa partisipá ku e muchanan i gosa di e naturalesa ku Boneiru tin pa ofresé.

Kada grupo a ekspresá loke nan a eksperensia na Boneiru i ta remarkabel ku nan a menshoná positivo tokante naturalesa di Boneiru. Promé reakshon di e grupo hulandes tabata ku Boneiru tin dushi klima. Despues Fenty Music a toka e djengel ofisial di e ‘Torneo di Reino 2019’.

Share This