BONEIRU TA E SENTRO PA KONFERENSIA ANUAL DI KLERONAN DI DIÓSESIS DI WILLEMSTAD

KRALENDIJK – Di 14 te ku 18 di òktober próksimo lo tuma lugá na Boneiru e konferensia anual di kleronan di Diósesis di Willemstad. E konferensia aki lo tuma lugá na Hotel Marriott i lo konta ku partisipashon di mas òf ménos 40 padernan inkluso ku partisipashon di nos monseñor Luis Antonio Secco. E tema di e konferensia ta: Batisá i Manda. Apertura di e konferensia lo ta dia 14 di òktober den oranan di atardi i lo klousurá e konferensia den oranan di mèrdia riba 18 di òktober. Mayoria pader di e 6 islanan lo yega Boneiru durante e promé dia di konferensia. Riba djaluna 14 di òktober despues di e promé dia di konferensia tur e padernan huntu ku monseñor Luis Antonio Secco lo selebrá Santa Eukaristia na misa di Playa, na Parokia di San Bernardo, pa 7’or di anochi. huntu ku parokianonan. Riba djamars 15 di òktober Santa Eukaristia ta tuma lugá na Parokia La Bírgen di Coromoto na Antriol pa 7or di anochi den kompania ku parokianonan. Djárason 16 di òktober ta toka turno pa parokia di Rincon San Luis Beltran pa 7’or di anochi. pa selebrá Santa Eukaristia ku pueblo di Rincon. Pader Santiago, vikario episkopal di Boneiru, na nòmber di monseñor Luis Antonio Secco ta invitá pueblo di Boneiru pa bin kompañá nos padernan di nos 6 islanan na selebrashon di Santa Eukaristia riba e tres anochinan aki.

Pader Santiago ta yama nos obispu Luis Antonio Secco i tur e pader di e diferente islanan un kaluroso bon bini na nos dushi isla di Boneiru i ta deseá tur nos padernan un konferensia riku na sabiduria, konosementu i forsa divino i ta pidi Dios Tata pa bendishoná e siman di konferensia aki pa asina nos Diósesis por sigui traha den union i komunion pa sigui kumpli ku boluntat di Dios den e trabounan pastoral.

Boso sirbidó

Pader Santiago Malagon Pedraza,Vikario Episkopal di Boneiru

Share This
error: Content is protected !!