HEFE DI RESHÈRSHE ALWYN BRAAF TA PIDI PA ENTREGÁ ARMA DI KANDELA

KRALENDIJK – Hefe di reshèrshe Alwyn Braaf ayera durante e enkuentro di polis i miembronan di prensa a menshoná ku ta pidi koperashon di komunidat pa entregá arma di kandela.

28 di òktober te ku 3 di novèmber por entregá arma (di kandela). E proyekto “Entregá i desarmá” tin komo meta pa kita arma di kandela i otro tipo di arma for di kaya mas tantu ku ta posibel, pero tambe pa enfatisá konsientisashon di e peliger di arma riba kaya.

Por entregá arma (di kandela) entre 8‘or di mainta pa 8‘or di anochi na warda di polis (KPCN). Por hasi esaki tambe na ofisina di Ministerio Públiko. Tin posibilidat pa traha un sita, pa laga rekogé e arma. Lo komprobá identidat di esun ku entregá un arma di kandela. No por entregá arma di kandela di un manera anónimo. Si después di un tèst di tiru resultá ku no tin insidente ku e arma, lo no persigui e persona ku tin e arma den su poder.

Si resulta ku si tin un konekshon di e arma entregá i un insidente, e persona ku entregá esaki, lo wòrdu skuchá komo un sospechoso. Otro tipo di arma, (arma pa dal, hinka of bati) si por wòrdu entregá anónimo.

Esun ku no entregá e arma di kandela awor na polis, i si enkontrá bo ku e arma di kandela despues di e fecha ku por a entregá esaki, lo bo por risibi un kastigu mas pisá. Esun ku entregá awor no ta keda pèrsiguí. Kisas ta arma di kandela di un persona di edat ku a fayesé i por trese esaki sin konstatá kastigu di prisòn. Djis pa mi informá, pa posishon di arma di kandela bo por haña kastigu di prisòn di 12 luna bai ariba, esaki sin ku bo hasi uso di e arma. Momentu ku kometé un echo usando e arma di kandela, e situashon ta otro pa loke ta trata kastigu di prison, hefe di reshèrshe Braaf a menshoná.  

Share This
error: Content is protected !!