Segun Wiliam Shakespeare, “Den bida di hende tin un ola ku si us’é bon e ta kondusí na fortuna. Si no hasi bon uso di dje e bida ta kai den awa plat i ta bira problema. Mester probechá di e koriente sino bo ta pèrdí”. Nuebe aña despues ku Bonaire a bira Entidat Públiko, komo munisipio di Hulanda, e pregunta ta ku si Bonaire ta riba un ola ku ta bai den direkshon di fortuna òf di perdishon. Diputado Elvis Tjin Asjoe ta kere firmamentu ku Bonaire ta riba e ola ku ta kondusí na fortuna. Sigur ta, ku ta bini for di Hulanda olanan ku ta trese kapital pa; enseñansa, salubridat, seguridat, pero Bonaire no ta riba e ola di seguridat sosial. Semper e ola aki ta kaba den awa ketu. Pa hasi algu riba tereno di seguridat sosial mester traha mil rapòrt, hasi inventario, hasi registrashon i analisá pa di tantísimo biaha e problema konosí. Ta bini un konseho di Raad van State i un rapòrt di IBO i mesora ta sali for di Hulanda olanan ku ta krese bira sunami. Ta ola di medida, ola di supervishon, ola ku barku di Piet Hein yen di konsehero, konsùltent, eksperto i supervisor ku ta regresá Hulanda kargá ku tesoro karibense. Tin pensamentu, ku ta bai bira realidat, pa: pone e repartishon di tarea ku a tuma lugá na 2010 na disposishon di Selibon. Eliminá Representante di Reino i duna mas tarea na e institutonan; gezaghèber i sekretario di Entidat Públiko Bonaire. Ministerio di Asuntunan Interno i Relashon di Reino ta bai haña un ròl mas fuerte. E ola brutu aki lo tapa palasio di Kolegio Ehekutivo. Koalishon no ta spièrta pueblo pa e polítika/peliger nobo di Hulanda. Mi ta mustra riba e historia di Hannibal ku a sali for di Carthago, Nort Afrika, krusa Spaña i Fransia bai Italia. Senadornan tabata reuní na Roma pa wak kon ta enfrentá Hannibal. Ta un mucha a grita dilanti di Senado: “Hannibal ante portas”. Hannibal ta pará dilanti Roma ku su ehérsito. Bonaire tin un mucha, Clark Abraham, ku konstantemente ta grita ku Hulanda ta den Kralendijk pero nos “senadornan” ta deliberando kon bagatelisá e mucha aki. Ta yega un dia ku e koalishon MPB/UPB lo eksperensiá loke a pasa ku e boneriano Minguel Pourier. Hasi loke Hulanda pidi pero na final, dal Minguel un bon skòp. Wak e polítika di Merka. Yuda e Kurdonan kombatí ISIS i awor kita man i laga Turkia gòlpia e kurdonan Sekretario di Estado Knops ta papia bon di diputado Tjin Asjoe. Mi ta atvertí diputado pa e dicho “Als de vos de passie preekt boer let op je kippen.” e nifikashon ta: no konfia hende ku ta kuchú di dos banda.

Arthur Sealy

Share This
error: Content is protected !!