KRALENDIJK – Ku golnan di Ayrton Ciclia, Rilove Janga i Jurven Koffy i ku un outogol, nos selekshon nashonal di futbòl di Boneiru, djadumingu último den oranan di atardi aya na St. Kitts & Nevis, a gana di British Virgin Island ku skor di 4-3.

Esaki sigur ta un viktoria importantísimo pa nos selekshon den e weganan di Nations League.

Boneiru a bai dilanti 1-0 den e partido ku pinalti anotá pa Ayrton Cicilia.

Na di 45 minüt, e gol di empate ta kai, e partido ta parti na dos pa sosiegu empatá 1-1.

E di dos mitar, na di 65 minüt Boneiru ta kai atras 1-2 i despues 1-3 atras na di 84 minüt di e partido.

E kapitan di e selekshon di Boneiru ku ta Rilove Janga, ku un bunita tiru den huki nobenta, ta kòrta bentaha na 2-3, esaki na di 88 minüt di e partido.

E partido ta haña 4 minüt èkstra i poniendo preshon riba e arko di British Virgin Island, outogol ta kai na fabor di Boneiru, e partido ta empatá 3-3.

Na 90+4 e gol di viktoria den hugada entre Jurven Koffy i Rilove Janga, Jurven Koffie ta anotá pa hasi e partido 4-3, loke tabata sufisiente pa nos selekshon di Boneiru gana e partido ku skor di 4-3.

Despues di e partido aki Boneiru su próksimo kompromiso den e weganan di Nations League ta dia 17 di novèmber 2019 kontra Bahamas na Kòrsou.

Nos selekshon ta regresá kas awe tardi.

Na regreso di e selekshon lo sigui prepará pa e siguiente kompromiso aya na Kòrsou kontra Bahamas otro luna.

Share This
error: Content is protected !!