ORANJESTAD – Minister Xiomara Ruiz-Maduro ta informa ku CAFT no ta satisfecho ku tur e trabounan ku Gabinete Wever-Croes ta hasiendo. Apesar ku CAFT a duna un evaluashon positivo riba e sifranan di e di dos kuartal di e aña aki, CAFT a konseha konseho di Minister di Reino pa duna Pais Aruba un ‘aanwijzing’.

Protokol di november 2018

For di aña 2010 Gobiernu di Aruba a bin ta sera Protokol ku Hulanda den kual ta indika ku lo bai atende ku e finansa di Aruba pa asina yega na un finansa publiko manehabel. Den kuadro di esaki a sera un Protokol na 2013 den kual a indika ku si kumpli ku algun meta, Aruba lo por haña asta plaka fia via Hulanda na interes redusi, un ‘zachte lening.’ Pero e situashon finansiero di Aruba desde 2010 a bira piho te ku na 2014, Hulanda a interveni via Gobernador pa no firma e presupuesto di Pais Aruba pa 2015. A disidi di pone Aruba bou di supervision finansiero di CAFT i den e lei di CAFT a pone normanan pa defisit pa añanan 2015 te ku 2018. E situashon finansiero di Aruba bou supervishon no a drecha i a bira piho bou un redoblashon di nos debe nashonal. Na momentu di kambio den gobernashon a bin resulta ku e proyekto di refineria ku mester a produsi entrada pa Pais Aruba, no a konkretisa kreando asina un defisit mas grandi i kune e echo di no lo por kumpli ku e norma di defisit pa aña 2018 manera fiha den artikulo 14 di e Lei di LAFT. Pa evita e menasa di un Dekreto di Rei (KB) pa inkumplimento ku e Lei di LAFT pa aña 2018, Gobiernu mester a drenta den negosashon ku Hulanda pa por stipula otro norma i otro kaminda kon pa yega na un finansas publiko manehabel. Esaki a resulta den e Protokol di november 2018 ku ta kubri presupuesto 2019 te ku 2021.

Menasa KB

For di e kuentanan anual di Pais Aruba pa 2018 ta resulta ku Gobiernu a kumpli ku e norma di defisit pa 2018 i a keda den margen di e apoderashon ku Parlamentu a duna Gobiernu pa por hasi gastu. Pa 2019 te ku e di dos kuartal, Gobiernu ta kumpliendo ku e apoderashon di Parlamentu. Riba e echo aki CAFT a raporta positivamente. Pero lokual CAFT ta keda kuestiona i ta pidi kambio di presupuesto pe ta e fondo di krisis Social (SCP). Segun e kolegio di supervishon e fondo di SCP mester ta inkorpora den Presupuesto 2019 pa asina e gastunan relata na personal ku ta wordu tuma pa ehekushon di e SCP, konta tambe den e maksimo di 479 mion. Segun CAFT su interpretashon di e Protokol di november 2018, e SCP ta forma parti di Presupuesto di Pais Aruba. Segun Gobiernu e SCP ta un fondo ku a wordu lanta apart ku su propio presupuesto manera otro fondonan di invershon ku Aruba a yega di konose i no ta forma parti integral di e Presupuesto di Pais Aruba pa 2019. Banda di esaki e fondo di SCP no tabata topiko tampoko di e negosashon pa yega na e Protokol di 2018. E diferensia di opinion aki entre Aruba i CAFT a eskala na nivel di politika entre Aruba i Hulanda por medio di un konseho di CAFT na konseho di Minister di Reino konsehando e organo pa duna Aruba un instrukshon por medio di un KB pa instrui konseho di Minister di Aruba pa kambia e Presupuesto di 2019 pa inkorpora e fondo di SCP aden manera ku CAFT a konseha. Tambe ta pidi pa instrui Gobiernu di Aruba pa ehekuta e plan di reforma fiskal integralmente i tuma medida nesesario pa por kumpli ku e normanan manera fiha den e Protokol 2018.

Share This
error: Content is protected !!