KRALENDIJK – Ayera tabata turno pa Santu Sakrifisio di misa na parokia La Bírgen di Coromoto despues ku djaluna tabata na parokia San Bernardo. Un selebrashon spesial kaminda mas ku 30 pader tabata presente. E padernan ta na Boneiru relashoná ku konferensia di klero Diósesis Willemstad 2019. Padernan enkabesá pa sirbidónan di misa a drenta misa den proseshon. Misa tabata kan kan di hende i pader, manera Pader Alphonsus Baak ta bisa. Predikashi tabata na enkargo di Obispu Luis Secco durante Santu Sakrifisio di misa.  El a menshoná entre otro di lekturanan ku ta papia di e tempu di awor. “Dios a mustra su grandesa, i awendia nos tin ku pidi señor, kon nos tin ku mustra loke Dios a krea i stima otro i forma un famia.

Si bo trata e kurpa malu, naturalesa trempan ta kobra. Papa a bisa, si bo kambia direkshon di un riu, momentu ku tin hopi yobida, e riu ta bai bèk e rumbo kustumbrá. Asina ta sosodé ku e ser humano. E ta desviá i na kaminda e ta pega, i bai bèk manera tabata na prinsipio. Hende mester resa sin kansa,”Obispo Secco a finalisá bisando.

Promé ku kantika final Pader Baak a dirigí algun palabra i a menshoná  ku 5 aña pasa pader nan a topa den e parokia La Bírgen di Coromoto ku tabata yen di sker den muraya. “Ku hopi esfuerso di trabou duru, awor nos a drecha misa i mas. Parokianonan a pidi, nan ke kumpra entre otro rosario, krus i mas i a traha ‘Gift Shop’. E kas ku ami ta biba aden, a haña un kambio drástiko. Den 5 aña hopi kos a sosodé. Hopi ta pidi pa hasi e edifisio kaminda ta hasi misa mas grandi, pasobra nan no ke sinta pafó. Ami a bisa nan, pruebami un aña sigui bin misa tur djadumingu i lo kumpli ku e deseo. Erko tambe ta posibel, sinembargo gastu di koriente ta oumentá konsiderablemente, pader Baak a bisa. Misa tabata animá pa Kor Flor di Coromoto. Despues di e selebrashon di Santa Eukaristia ku tur pader, tabatin oportunidat pa kombersá ku padernan i saka potrèt. 

Share This
error: Content is protected !!