KRALENDIJK – Djaluna mas di 30 pader a yega Boneiru i a reuní huntu ku obispu Luis Antonio Secco.

Nan presensia na Boneiru ta relashoná ku e konferensia di klero Diósesis di Willemstad. E promé momentu ku nan a sinta huntu na Boneiru, tabata den presensia di prensa, algun miembro di gobièrnu, entre otro diputado James Kroon i Nerry Gonzales i gezaghèber interino Curvin George.

A inisiá e atardi ku orashon den e sala i seguidamente a dirigí palabra gezaghèber interino Curvin George. El a menshoná, e ta kontentu ku e grupo di pader a reuní. “Ta importante pa sinta huntu i deliberá riba diferente punto. Union ta hasi forsa. Nos gobièrnu di Boneiru ta kontentu ku a skohe Boneiru pa e reunion. Boneiru ta den desaroyo i mester di boso sosten,”entre otro gezaghèber interino George a menshoná.

Despues a papia Vikario General Greg Redoblado.
El a elaborá riba e tópikonan ku nan ta bai papia ariba durante e dianan. “Tema di e konferensia ta “Batisá i Mandá. Awor ta di 11 konferensia unda padernan ta sinta huntu. Nos a bin pa 2 motibu kaminda nos ta bai sinta disfrutá i traha. Nos mester ta padernan alegre. E konferensia mester sirbi pa fortifiká nos. Komunidat ta kontentu ora e ta mira pader nan uni. E alegria di nos komo pader ta den loke nos ta hasi pa e hende. E mishon ku nos tin ta loke e vatikano segundo ta hasi. Un manera nobo di ta un Diósesis. Un manera nobo di ta pader. Un manera nobo di ta obispu. Un manera nobo pa ta den iglesia. 37 parokia di nos Diosesis tin repartí riba 6 isla. Aruba, Boneiru, Kòrsou Saba, Sint Eustatius, St. Maarten,”entre otro Vikario General  Redoblado menshoná. Tambe a duna un splikashon di e logo, kiko e ta representá, entre otro e kolo.
Seguidamente a dirigí palabra Pader Alphonsus Baak despues a papia pader Alphonsus Baak.
El a elaborá riba diferente kos ku a sosodé entre otro kon el a keda batisá. “Batisá no ta un tradishon, sino e tin hopi mas nifikashon,”pader Baak a menshoná. El a papia tambe tokante e relashon di padernan di Diósesis di Willemstad i a menshoná e forma kon komuniká i trese mas hende den iglesia. 

Share This
error: Content is protected !!