KRALENDIJK – Algun hóben riba nan mes inisiativa a disidí pa fèrf e pilá blanku riba kaminda “Jato Bako” pegá ku bario Amboina. Algun dia atras Radio Live 99.9 FM a saka potrèt di e sitio, despues ku algun persona a pidi pa publiká kon e pilá tabata di spùit ku mensahe ariba. E meta tabata pa esnan konserní hasi algu na e situashon. Awe Radio Live 99.9 FM a keda yamá pa e hóbennan i a wordu informá ku a fèrf e muraya i tapa loke tabatin skirbi. Esaki ta bon ehèmpel di hóbennan ku a mira algu ku no ta duna bunita bista i a tuma e desishon pa fèrf e pilá blanku. Banda di fèrf e pilá, momentu ku un reportero di radio Live 99.9 FM a presentá na e sitio, nan tabata kòrtá rama i pone e sitio rondó di palu blanku, manera nan ta yam’é, limpi. Tuma bon nota di e hóbennan i duna nan kòmplimènt pa loke nan a hasi. Ta ehèmpel pa otro hóbennan i adulto.

Share This
error: Content is protected !!