RUDY CROES TA DEBOLBE SU CONDECORACION REAL NA REY WILLEM ALEXANDER!

0 Comment


ORANJESTAD – Ex-Ministro di Husticia, Ex-Vice Premier, Ex-Presidente di Parlamento, Ex-Miembro di Parlamento, Hyacintho Rudolfo(Rudy) Croes Ta Debolbe Su Condecoracion Real Cu El A Ricibi Na Su Mahestad Rey Willem Alexander!

Rudy Croes a haci e siguiente declaracion relaciona cu e Condecoracion Real cu el a ricibi algun aña pasa.

Varios aña pasa, mi tabatin e honor di keda condecora cu un distincion Real. Esaki mi a ricibi e tempo ey cu sentimentonan mixto. Hopi tempo caba ta den mi cabes pa debolbe esaki, pasobra e trato di e partnernan den Reino no ta igual y e respet mutuo no t’ey. Mi a carga pasenshi pa wak si e actitud colonial lo caba o cambia? Desapunto a crece cu e actitud di hopi di e politiconan Hulandes (mi no ta generalisa) y a bira hasta algo cu lo ocasiona rabia den cualkier persona! E trato colonialista ta expresa su mes den e practica di “formanan di esclavitud criminal contra nos pueblonan”. Recientemente por a presencia con un luchador pa libertad di su pueblo di Boneiro , señor James Finies a ser molestia fuertemente na unda hasta a viola su derechonan humano. Señor James Finies a expresa: “Nos Kier Boneiro Bek” cu tabata un protesta contra e anexion di Boneiro cu ta e pior forma di colonizacion! Na Statia a manda un Conseho Insular y Conseho Ehecutivo cas, cu a keda eligi democraticamente, pa pone muchanan manda di Hulanda pa haci y deshaci eynan! Ta nenga e pueblo di Statia pa bay eleccion nobo pa eligi un Conseho Insular, pero si ta pidi nan vota pa eleccion pa Parlamento Europeo, ki bofta mas grandi pa e pueblo di Statia.

Dia 10-10-10 (10 october 2010) e anexion “vergonzoso” di Boneiro y Statia a keda ehecuta, a pesar cu nunca nan a vota pa esaki. Al contrario, e anexion aki a keda rechasa totalmentemente pa e pueblonan di Boneiro y Statia! Aruba a haya su Status Aparte na januari 1986 y esaki no a bin como regalo. Hulanda no a exonera ningun debe di Aruba. El bay a base di un lucha di sanger, sudor y lagrima bao guia di Betico hunto cu su pueblo Arubiano! Na 10-10-10 (10 october 2010) Corsou y Sint Maarten a haya status di Pais Autonomo den Reino pero cu un supervision pisa tanto riba husticia como finanzas di parti di e Pais Colonizador Hulanda. Awor e pais colonizador ta sigui cu e practica di menaza y chantahe na un forma inhumano contra nan autonomia y cada biaha ta keda impone supervision y medidanan disproporcional! E practica aki a bira asina comun, cu awor hasta ta purba, cueste loke cueste, pa haci igual cu Aruba; atrobe cu menaza y chantahe! Tur esaki ta pasobra e pais Colonizador Hulanda a tuma nota di e interes economico cu presencia di gas y petroleo den Caribe. Despues di e tragedia 10-10-10 ariba menciona: e “Vision di Betico” mester bin riba mesa pa “un Reino di 7 pais independiente den un mancomunidad’ y cu lo bira ; duradero , responsable , basa riba respet y dignidad mutuo”. E Reino lo consisti di 7 pais (den orden alfabetico): Aruba, Boneiro, Corsou, Hulanda, Saba, Sint Maarten y Statia.

(A) Rey o Reina na cabes di Reino;

(B) Pasaporte di Reino y/o di cada pais (esaki ta existi caba den ReinoUni);

(C) Reglanan institucional pa finanza publico y husticia;

(D) Consorcio di paisnan pa percura pa nos soberania y seguridad.

Rudy Croes ta expresa:

CONSIDERANDO CU: • Un pais so den Reino so no por saca un otro pais for di constelacion di Reino; • E señalnan di menaza, chantahe, violacion di derechonan humano pa parti di e pais colonizador/anexador Hulanda a empeora y a bira mas cu un custumber contra e paisnan autonomo Aruba, Corsou y Sint Maarten; • Tambe e mas rechasabel ta e anexion total di Boneiro y Statia, hasta cu tendencia racial, violacion derechonan humano y hasta esclavisador; • Cu Conferencia Permanente Di Partidonan Politico di America Latino y Caribe (COPPPAL) tambe ta condena y rechasa cualkier forma di colonizacion/anexion den e continente Americano; • Hyacintho Rudolfo (Rudy) Croes ta Vice-presidente di COPPPAL encarga cu Casonan di Colonizacion pa COPPPAL, COPPPAL ta rechasa existencia di formanan colonialista den e Continente Americano; TA DICIDI: • Di debolbe e Condecoracion Real na Su Mahestad Rey Willem-Aalexander; • Di informa señor Gobernador di tal decision’ • Cu na momemto di su regreso na Aruba lo debolbe e articulonan di condecoracion na Señor Gobernador, pa asina na su turno Señor Gobernador haci esakinan yega cerca Su Mahestad Rey Willem-Alexander.

Atentamente, Hyacintho Rudolfo (Rudy) Croes

Share This