KRALENDIJK – Djabièrnè mainta a desvelá un monumentu na rotònde Sùrnan di Roosendaal dilanti parokia San Bernardo.

Un kantidat di persona tabata presente, entre otro diferente sùr ku a bin Boneiru spesial pa e okashon. Promé ku a revelá e monumento, a dirigí palabra algun persona. Promé tabata diputado James Kroon, e persona ku pusha pa logra pa e monumentu. Diputado Kroon: “Awe mainta nos ta aki pa algu importante, loke gobièrnu di Boneiru a kontribuí n’e. Nos ta biba den un komunidat i mester siña muchanan tokante nos historia. Kòmpiuter ta bon pero tin mas kos ku mester yega na konosementu di e hende. Sùrnan a hasi hopi kos pa nos, entre otro siña nos lesa i skirbi, loke ta hopi importante. Gobièrnu ta yama e sùrnan danki pa nan kontribushon, “entre otro diputado Kroon a menshoná. Seguidamente a papia Valdemar Marcha, kende a menshoná entre otro kon sùrnan a yega Boneiru. Sùrnan hulandes ku poko fasilidat a hasi hopi pa e isla den pasado, el a bisa. Despues pader Alphonsus Baak a papia kende tin hopi konosementu i a eksperensiá algun di e sùrnan ku tabata na Boneiru.
Na Hulanda ami a haña lès serka sùrnan. Un di nan a bisami ku mi por bira saserdote, tabata entre otro loke pader Baak a menshoná. Despues a papia Glenda Bernabela, kende ta responsabel pa sùrnan. “Mi ta gradisí pueblo i gobièrnu pa e atenshon pa nos sùrnan. Nan edat a subi, sinembargo nan ta hasi loke mester hasi spiritualmente,” el a menshoná.
Despues sür Sila a resa un karta ku sùr Magriet a skirbi. Despues a toka turno pa bai na e rotònde di Sùrnan Roosendaal i a desvelá e monumentu. Obispu Luis Antonio Secco a hasi orashon pa despues bendishoná e monumentu i esnan presente. A menshoná ku despues e idea ta pa traha na e sitio imágen di sùrnan.

Share This
error: Content is protected !!