PAROKIA SAN LUIS BELTRAN YENÁ KU PADER

Kralendijk – Djarason un kantidat di mas ku 30 pader a sinta na altar, despues di a drenta parokia San Luis Beltran den proseshon. E siman aki mayoria di pader di Diosesis di Willemstad ta di bishita na Boneiru pa tuma parti na e konferensia anual 2019 di kleronan.

Promé ku misa tabatin un momentu di orashon, pa despues kontinuá ku Santu Sakrifisio di misa. E orashon tabata na enkargo di pader Morrison. Obispu Luis Antonio Secco a prediká i bisa awe señor a regalá nos otro anochi pa selebrá huntu. Lema di e konferensia ku nos ta na Boneiru ta bisa: ‘Batisá i Mandá’. “Durante aña nos ke selebrá algu mas. Hopi bes nos ta keda ku fe chikitu. Otro grupo nan tur a krese den fe. Dios a duna nos un konsenshi pa komprondé bon i malu i no husga otro. Mustra den nos bida kiko nos ta di bèrdat,”obispu a menshoná. El a sigui bisa:” Nos a papia entre otro den nos enkuentro ku padernan, si nos tin amor, e lei ta bira mas fásil. Mama i tata ku ta stima nan yu, nan no tin hopi prekupashon. Amor ta trese union. Stimashon ta riba i ta mas ku tur kos. Hesus a bin pa salba nos. Nos mester di boso orashon,Obispu a terminá bisando.
Promé ku a kanta kantika final, pader Ivan Dario Perez Gomez a papia i pidi pa nos sigui pa dilanti. “Resa pa nos, i nos ta resa pa boso,”pader Ivan a menshoná. Seguidamente a yama tur parokiano kende a kumpli un aña mas di bida i grupo di dama ‘Aproda’ ku a kumpli 28 aña di eksistensia, pa un bendishon spesial.
Despues di misa padernan a saluda parokianonan i a kontinuá ku un komementu, kompaña pa músika di ‘Foyan Boyz’.

Share This
error: Content is protected !!