KRALENDIJK – Suidadano Richard ‘Cha’ Pietersz ta remarká algun situashon, segun e polítikonan a laga Rincon na kaya.”E bèrdat i nada mas ku e bèrdat. Imposibel ku Rincon no tin komishon di bario pa trese informashon i formashon pa un mihó progreso pa e bario. Tristu pa tende polítikonan di Rincon papia hopi bunita di norma i balor, dignidat pa un mihó progreso pa é bario di Rincon i den práktika nada ta sosodé. Politikonan ta papia hopi bunita den temporada di kampaña, bandera dòrná na kas di miembro i lidernan. Ta primintí shelu i tera pa e pueblo pero despues tur kos ta keda den silensio, ”Cha a menshoná.

El a sigui bisa: ”Tur organisashon polítiko ta konfundí pueblo pa saka interes personal i despues nan mes tin konflikto, pone nos den divishon kontra di nos mes. Tur organisashon ku a partisipá den kampaña a lubidá mes riba e tormento tropikal ku ta kalamidat riba nan propio Isla ku ta Bonaire. Tristu pa bo mira un sentro di bario ku mester sirbi na momentu di un kalamidat, ta den dekadensia. Hopi teribel mira momentu di nesesidat pa transporte di Ambulans na Rincon, e vehíkulo no ta na e sitio ku e mester ta pa por duna servisio na momentu nesesario. Mi persona no ta bai wak organisashon polítiko den e bario di Rincon. Mi ta wak interes di e pueblo i no divishon polítiko den e Bario di Rincon. Tristu momentu ku bo pasa den kos pa otro ku no sa mes kiko ta pobresa, mizeria i desempleo na Bonaire. Tristu pa momentu un persona bini ku otro alternativa, sierto persona ta hasi komo si fuera ta nan pensamentu. Den kampaña Organisashon Polítikonan a papia di kalamidat? Organisashonnan polítiko partidista kristian a papia di kalamidat eventualmente Ambulans pa ora di kalamidat pa é pueblo di Rincon? Inkreibel momentu algu sosodé den Rincon, no tin servisio no tin transporte pa aliviá persona ku un kemadura grave, i mester di ambulans pa transporte,”Cha a konta. El a finalisá bisando: ”Mi persona ta kontra di inhustisia.”

Share This
error: Content is protected !!