KRALENDIJK – Awe 22 di òktober ta nèt 10 aña ku e avion ku registrashon PJ-SUN di e kompania Divi divi Air, a hasi un aterisahe di emergensia den laman pegá ku Klein Boneiru. Piloto di e avion, Robert Mansell (32) a pèrdè su bida. E 9 pasaheronan ku tabata bordo di e avion, si a logra sobrebibí. E aksidente aki riba 22 di òktober 2009 a sakudí Boneiru i Kòrsou. E avion di Divi Divi Air, buelo DVR014, tabata un buelo for di aeropuerto Hato di Kòrsou pa aeropuerto Flamingo di Boneiru. E avion a lanta buelo for di Kòrsou sin problema. Tabata 10 minüt despues ku e avion a lanta, ku e motor na banda drechi a kai afó. Piloto Mansell a disidi pa sigui e buelo riba un motor, sperando di por alkansá aeropuerto Flamingo. Pero tabata na masomenos 24 mia pabou di Boneiru ku e piloto a informá toren di aeropuerto Flamingo ku e no ta logra yega pista di aterisahe bulando riba un motor so, i e lo tin ku hasi un aterisahe di emergensia den laman. E avion (Britten-Norman BN-2A Islander) na e momentu ei a kuminsa pèrdè altura. Pasaheronan a konta ku e piloto no a komuniká ku nan na niun momentu tokante loke tabata pasando i solamente a indiká na nan pa bisti nan chaleko di salbabida, mientras nan tabata mira kon e avion tiki tiki tabata pèrdè altura. Tabata tin pasahero ku no a logra di bisti e chaleko di salbabida. Na momentu ku e avion a ‘ditch’ den laman na masomenos 930 meter for di kosta di Klein Boneiru i 5.6 kilometer for di Boneiru, tur nuebe pasahero a logra sobrebibí sinembargo kapitan Robert Mansell a pèrdè su bida. Despues di e impakto, el a keda pegá den kòkpet i a bai profundidat di laman ku e avion. E pasaheronan a konta ku Mansell tabata leshoná na su kabes i a pèrdè konosementu, mirando ku e no trata na niun momentu pa sali for di e avion òf yuda pasaheronan. Tin pasahero ku a intentá na sake, pero no a logra. Botonan di buseo ku tabata den bisendario mesora a yega serka i reskatá e nuebe pasaheronan. Tabata 2 luna despues, ku ekiponan basta sofistiká, ku a logra saka e avion for di den laman. E restunan di Mansell tabata ainda den e avion.

Share This
error: Content is protected !!