Despues di: Toubot, OTB, intento di soborno awor ta asuntu di hür di kas den bario a base di puntuashon i e bario riba su mes ta bai bira e storia di bario. Mester ta kla ku na rant di Kralendijk a nase aglomerashon di bibienda i hotèlnan luhoso ku ta kosta un kapital. Meskos por papia di rant di e barionan; Nort di saliña i Antriol. Den Nikiboko tin un parti ku bibiendanan luhoso ku ta forma un union ku e bario. Den Tera Kòrá i Den Tera tin Komunidat será, ku bibienda luhoso i kas di pueblo .Rincon tin otro problema ku ta terenonan ku di un manera òf otro a pasa pa otro persona sin a pone esnan ku tabatin e tereno promé.na altura. Den e akuerdo di Atministrashon tin pará ku Konseho Insular ta stipulá ordenansa di: preis di hür, komishon di hür supsidio di hür i di alohamentu. E ordenansanan aki ta ofresé e posibilidat pa regulá e merkado di bibienda i e gastunan máksimo di hür. Kolegio Ehekutivo ta desaroyá un maneho di bibienda. Mi ta tene mi kurason ku ta bin un maneho ku ta enfatisá solamente bibienda sin tene kuenta ku e importansia di un komunidat. Hende mester tin e “heful”, sintimentu di ta pertenesé na un komunidat i no solamente tin área definí a base di puntuashon. Mester tin interakshon entre hende, den komunidatnan será esaki no ta posibel. Ta krea e impreshon di tin dos sitio den un bario ku ta nifiká esun será ta sigur i e otro parti di bario ta: insigur, tin shushi tur kaminda, tin pobresa, kriminalidat i bibienda den mal kondishon. Mester evitá ku maneho di bibienda ta kibra karakter di un bario si no tene kuenta ku e koherensia sosial i e kapital sosial. E meta mester ta: Sentimentu di ta pertenesé na un komunidat ta promové e kapasidat di kada persona pa progresá. Mi konseho tantu na Kolegio Ehekutivo komo na e koalishon den Konseho Insular ta esaki” Het roer moet om” na papiamentu: mester kambia di rumbo.

Arthur Sealy

Share This
error: Content is protected !!