KRALENDIJK – James Kroon lider polítiko di partido Union Patriótico Boneriano den un entrevista na radio Live 99.9 FM a papia relashoná ku selebrashon di 50 aña di eksistensia di partido. ”E aña aki ta selebrashon grandi, 50 aña di eksistensia di partido Union Patriótico Boneriano, dia 23 di òktober 2019. No ta fásil e kantidat di aña pa mantené un partido polítiko, spesialmente den e tempu moderno di awor. Ta bai tin diferente selebrashon. Nos ta gradisí na promé lugá Dios ku e 50 aña di eksistensia i ta bai invitá diferente miembronan klave ku a hasi hopi pa partido. Pronto nos ta menshoná e aktividatnan ku ta bai tin. Djarason 23 di òktober 2019, 7’or di anochi na parokia San Bernardo ta bai tin un Santu Sakrifisio di misa, ”Kroon a menshoná. El a sigui bisa: ”Nos relashon huntu ku MPB den gobièrnu awor ya 6 luna i ta kosnan ta bai den bon direkshon. Boneiru den e situashon nobo nos mester realisá ku ta esaki tabata deseo di pueblo i tin kos ku tin atenshon pa mehorashon. Mester di pasenshi pa poko poko kosnan mehorá. Resientemente a tuma lugá un aktividat spesial pa sùrnan, algu ku un grupo chikitu den algun dia a realisá. Boneiru mester di kada un di nos, i no hende ku ta hunga mas sabi ku otro. Huntu nos ta logra. Laga politikeria un banda i traha huntu pa logra mas. No ta importá koalishon òf oposishon. Nos mester haña otro i sigui traha riba e fundeshi ku tin pa yega na un kas stabil pa nos tur,”Kroon a finalisá bisando.  

Share This
error: Content is protected !!