KRALENDIJK – Sentro Hubentut i Famia(SHiF) a pone man huntu ku e plataforma di Amboina pa organisá un siman di Edukashon di 14 òktober pa 18 òktober ku tabatin komo tema “MAN DEN MAN”.

Den e siman aki mayornan por a partisipá na e dos diferente charla ku a tuma lugá den e bario di Amboina. E tópikonan “Ta Mayor i Mama Soltera”. E charlanan a wòrdu skohe dor di e habitantenan i Sentro Hubentut i Famia a duna sosten pa organisá i ofresé e tópikonan.

For di kada charla a sali diferente puntonan manera:

*Preokupashon i tambe puntonan fuerte ku famianan ta enkontra nan mes kuné na kas i tambe den nan bario i kon huntu komo famia òf bisiña por bin ku solushon òf deseonan pa mehorashon.

*E importansia i nesesidat pa tin aktividatnan regularmente den un bario pa keda tin un konekshon ku otro i pa traha riba e union.

*E nesesidat pa mayornan por ekspresá nan mes den gruponan kaminda ku nan por wòrdu skucha sin wòrdu husga.

SHiF i Plataforma Amboina a laga hubentut di Amboina inskribí pa un show di talento.

Intenshon di e show aki tabata pa saka e talentonan positivo ku tin skondí den e bario di Amboina. Riba 18 di òktober na e show di “Amboina tin Talento” mayornan i tur presente por a opservá i gosa kuantu kurashi i kuantu talento e muchanan aki tin. Muchanan a duna show riba; baiskel, Quad, futbòl, baile, kanto i asta un tata ku tambe kier a demostrá su talento den Thaiboxing.

Aktividatnan asina aki ta yuda;

* muchanan krese den nan konfiansa propio i ta duna nan kurashi i ánimo pa sigui wak kon e por desaroyá loke e ta bon den dje. SHiF ta haña importante pa keda krea oportunidatnan kaminda muchanan ta haña e chèns pa ekspresá nan mes den un forma positivo i krese den nan konfiansa propio.

* Traha riba e union di un bario.

Na inisio di e show di talento Diputado señora Nina den Heyer a hiba palabra i a uni forsa pa duna man na SHiF i Plataforma pa progreso di Amboina i kada bario di Boneiru.

E atardi aki tabatin un momentu ku mayornan por a aserká diferente fundashonnan invitá manera: Kurashon liber, Desaroyo integral di bario, Dance sensation, Anything is possible soccer academy i Sentro pa Hubentut i Famia, pa sera konosí, tuma informashon i hasi preguntanan na e diferente fundashonnan presente.

Na final SHiF a regalá bario di Amboina un palu di Mahòk ku a sirbi e atardi aki komo un palu di deseo. Kada habitante i bishitante a haña un chèns pa buta nan deseo i speransa pa e bario aki.

Sentro pa Hubentut i Famia ta gradisí Plataforma Amboina pa e bon koperashon i tambe un danki na tur e personanan, fundashonnan ku a duna nan aporte di un otro manera pa realisá huntu un bunita siman di edukashon ku tabata na bienestar di mayornan i muchanan di Boneiru.

Share This
error: Content is protected !!