Willemstad – “Kòrsou mester ehekutá lihé i ku determinashon e reformanan ku mester fortifiká e pais den un forma duradero”, asina Kolegio di supervishon finansiero Kòrsou i Sint Maarten (Cft) ta deklará. E instrukshon ku Konseho di Minister di Reino a duna Kòrsou na yüli, kombiná ku ehekushon di e Strategia di Kresementu, ta brinda oportunidat pa kambia e rumbo na un manera sostenibel.

Konseho di Minister di Reino riba 12 di yüli 2019 a duna gobièrnu di Kòrsou un instrukshon pa balansá e gastunan i entradanan riba término mas largu. E instrukshon ta preskribí entre otro ku mester kompensá un défisit kalkulá pa aña 2019 den e mésun aña ei ainda, i tambe kompensá e défisitnan akumulá di 2017 i 2018 di 175,3 mion florin ku e surplusnan di 2020, 2021 i 2022. Ademas mester eliminá a base di e surplusnan aki tambe e retraso den pago di e debenan ku tin na Fondo General di Penshon Kòrsou (APC) i Banko di Seguro Sosial (SVB), di kual e término di pago a vense.

Strategia di Kresementu

Desempleo na Kòrsou ta haltu kompará ku otro islanan den Karibe. Desempleo hubenil ta asta 33 porshento. Den e Strategia di Kresementu gobièrnu a indiká kon mester reformá e ekonomia. Ta trata aki di prinsipalmente reformanan struktural, manera reforma di merkado laboral, fortifikashon di poder gubernamental i realisashon di un klima di invershon ku ta stimulá mas, pa di e forma aki hasi posibel ku kapital humano i finansiero berdaderamente por keda utilisá.

Akuerdo di Kresementu

Kòrsou i Hulanda a firma un Akuerdo di Kresementu tokante di e pasonan konkreto ku gobièrnu mester tuma den e periodo benidero i e sosten ku Hulanda lo brinda den e kuadro ei. E Akuerdo di Kresementu ta ofresé espasio pa usa rekursonan adishonal i asistensia riba tereno di personal. E Akuerdo di Kresementu ademas ta permití prolongashon di e término di kompensashon, si resultá den yüli di 2021 ku a kumpli sufisientemente ku e palabrashonnan. Ta di gran importansia pa hasi uso optimal di e Akuerdo di Kresementu.

Ehekushon di presupuesto 2019

E pronóstikonan di e aña presupuestario 2019 a keda ahustá i e presupuesto, inkluso e promé modifikashon di presupuesto, tin un servisio regular balansá. E entradanan di impuesto a subi, loke parsialmente por atribuí na un di bon insidental di 42,1 mion florin prosedente di e Areglo di Impuesto di Reino (BRK). Pa 2019 tambe tin e tarea pendiente pa kontrolá gastunan i perkurá pa realmente realisá e entradanan. Despues di e kandela na Landsontvanger tambe e tarea aki ta keda vigente.

Curaçao Medical Center

Apertura di e hòspital nobo Curaçao Medical Center (CMC) ta planeá pa tuma lugá 15 di novèmber 2019. Gobièrnu a entregá den ougùstùs un petishon pa un fiansa adishonal di 200 mion florin. Antisipando riba e business case aktualisá ku e second opinion korespondiente – kual ainda no a ser risibí – Cft a manda un reakshon provishonal riba 27 di sèptèmber 2019. Esaki ta enserá un posibilidat pa fia 103,7 mion pa medio di inskripshon koriente, basta kumpli ku algun kondishon stipulá. Ademas di e business case, ta trata tambe di kubrimentu di gastunan adishonal di eksplotashon di CMC, kompará ku SEHOS. Despues di risibí e dokumentonan pidí – kual segun palabrashon awor lo keda entregá aki sinku siman – lo manda un reakshon definitivo di Cft riba e petishon di fiansa.

Maneho finansiero

Mayoria di e sup-proyektonan ku ta forma parti di e Roadmap pa yega na un deklarashon aprobatorio di akountent pa e kuenta anual di 2021, miéntras tantu a keda inisiá. Kòrsou ta premirá ku lo no tin sufisiente kapasidat pa ehekutá e plannan aki. Pa e motibu aki Cft ta konsehá gobièrnu pa utilisá e espasio ku e Akuerdo di Kresementu ta ofresé, i hasi petishon pa sosten pa e propósito aki tambe. Ta esensial pa keda ku enfoke pa protehá e konosementu i abilidatnan atkerí.

Cft a hasi un bishita na Kòrsou di 21 te ku 23 di òktober i a hiba kòmbersashon ku Gobernadó, minister di Finansa (dos bes, di kua un bes minister a keda asistí pa MRT), Konseho di Minister, e Komishon Finansiero di Parlamento, Komishon di Progreso di Akuerdo di Kresementu, Stichting Overheidsaccountantsbureau (SOAB), gerensia di SEHOS, Banko di Seguridat Sosial (SVB) i Banko Sentral di Kòrsou i Sint Maarten (CBCS).

Djaluna 21 di òktober presidente di Cft, profèsòr Raymond Gradus, a tene un charla públiko titulá “Supervishon finansiero i kresementu ekonómiko”. Por konsultá e presentashon riba wèpsait di Cft: www.cft.cw.

Share This
error: Content is protected !!