Kralendijk – Kolegio di supervishon finansiero Bonaire, Sint Eustatius i Saba (Cft) ta pidi Kolegio Ehekutivo i Konseho Insular di Bonaire pa pone atenshon na ehekushon di e intenshonnan gubernamental presupuestá. Den e di dos reportahe di ehekushon, pagonan di gastunan pa personal ta kedando atras kompará ku loke ta presupuestá, miéntras ku hustamente fortifikashon di e staf den aparato gubernamental pa basta tempu ta un di e puntanan di lansa di Bonaire. Cft a bishitá Bonaire riba 22 òktober i a hiba kòmbersashon ku entre otro miembronan di Kolegio Ehekutivo i Konseho Insular.

Presupuestonan 2018 i 2019

Riba 25 di yüni Konseho Insular a aprobá e kuenta anual di 2018 di Bonaire. E aña a sera ku un resultado positivo di 12,7 mion dòler. Di e surplus Konseho Insular a destiná 7,1 mion dòler pa entre otro infrastruktura i trabou di mantenshon.

E di dos reportahe di kuartal di aña 2019 ta laga mira te ku yüni 2019 un saldo positivo di 11,2 mion dòler. Cft ta hasi un petishon na Kolegio Ehekutivo pa ehekutá e intenshonnan gubernamental ku determinashon, pa evitá ku aña 2019 tambe ta sera ku un surplus. Cft ademas a bolbe urgi Kolegio Ehekutivo pa presupuestá e entradanan di impuesto i e gastunan di personal mas realístiko. Den e último añanan a presupuestá e gastunan di personal di personal kada bes muchu haltu i e entradanan di impuesto muchu abou.

Ehekushon di akuerdo di gobernashon

E akuerdo di gobernashon, ku na no Kolegio Ehekutivo i Konseho Insular ku na novèmber 2018 a keda firmá entre Bonaire i Hulanda, for di aprel di e aña aki ta den ehekushon. E di dos reportahe di ehekushon a keda entregá komienso di òktober. For di esei por dedusí ku a kuminsá ku fortifikashon di e kapasidat di ehekushon. Sinembargo tin mester dal algun paso mas riba e tereno aki. Pa e motibu aki for di mei di e aña aki Departamentu di Asuntunan di Personal i Organisashon (P&O) ta realisando un investigashon di e fail di e personal. A base di e resultadonan di e estudio lo traha un plan di mehora. Cft ta warda e plan aki ku interes.

Siklo di presupuesto i responsabilisashon

Cft ta konstatá mehora riba algun aspekto. E siklo di presupuesto i responsabilisashon ta kanando segun planning. E konsepto di presupuesto di aña presupuestario 2020 a keda entregá riba 7 di ougùstùs na Cft pa konseho i riba 2 di sèptèmber esaki a keda entregá na Konseho Insular, teniendo en kuenta e konseho di Cft.

Pa loke ta trata e parti di yena puestonan den Konsehonan di Komisario di entidatnan gubernamental tambe tin algun progreso. Na Water en Energiebedrijf Bonaire (WEB) i Bonaire International Airport (BIA) e Konsehonan di Komisario miéntras tantu ta kompleto. Konseho Ehekutivo awor ta trahando pa yena e puestonan di e Konseho di Komisario na Oil Trading Bonaire (OTB). Entrega na tempu di kuentanan anual di e entidatnan gubernamental sí ainda ta pidi hopi atenshon.

Maneho finansiero

E Kolegio ta pidi atenshon kontinuo di Kolegio Ehekutivo i Konseho Insular pa e maneho finansiero, ku ketu bai no ta na òrdu. Esaki por nota na e deklarashon di apstenshon di opinion e akountent pa e kuenta anual di 2018, a base di erornan konstatá i aspektonan ku ta insigur. Si no bini mehora den e aspekto aki, esaki por resultá di ta un estorbo pa logra risibí un deklarashon aprobatorio di akountent pa e kuenta anual 2021.

Den luna di sèptèmber a entregá e plan di mehora di maneho finansiero 2.0 na Kolegio Ehekutivo. E sup-proyektonan ku ta habrí ainda i ku ta prosedente di e plan di mehora 1.0, parsialmente a keda integrá den e plan di mehora 2.0. Cft lo monitòr e implementashon di e plan di mehora di maneho finansiero 2.0 di aserka.

Durante di bishita di Cft kòmbersashonnan a ser hibá ku Kolegio Ehekutivo, Konseho Insular i e mènedjer di programa di e Akuerdo di Gobernashon.

Share This
error: Content is protected !!