KRALENDIJK – E kampionnan di Real Rincon djárason último den partido final pa Super Kopa den oranan di anochi den Stadion Antonio Trenidad na Rincon, a gana e Super Kopa despues di a gana di Estrellas ku skor di 4-1.
Na momentu ku e partido a parti na dos pa sosiegu, Real Rincon tabata dilanti 2-0 den e partido ku golnan di Jerson Agostien i Lacey Pauletta.
E di dos mitar Real Rincon ta anotá na dos okashon mas pa bai dilanti 4-0 den e partido, esaki ku golnan di Jerson Agostien ku a hinka su di dos gol di e partido i gol di Ilfred Piar.
Estrellas a sigui move i Roderick Serberie ta logra kòrta bentaha na 1-4, skor tambe ku e partido a finalisá kuné.
Ku e resultado aki Real Rincon ku ta kampion di e kampionato 2018-2019 di Boneiru, ta gana tambe e Super Kopa 2019.
Ta bon pa menshoná i aklará pa esnan ku no sa, e final pa Super Kopa e aña aki a bai entre e kampion di kampionato di FFB ku ta Real Rincon, i e ekipo ku a gana Kopa di Oro ku den e kaso aki ta e ekipo di Estrellas, loke a dun’é derecho pa hunga e final pa Super Kopa kontra Real Rincon.
MVP di e partido ta e hóben Marnix Eustachia di Real Rincon.
Na final di e partido e kordinadó di kampionato pa FFB ku ta sr. Patrick Mariana, a hasi entrega di e premionan ku ta e Super Cup i tambe premiashon pa Marnix Eustachia ku ta MVP di e partido pa SuperCup.
.
