KRALENDIJK – Partido polítiko Union Patriótiko Boneriano a selebrá 50 aña di eksistensia i durante e selebrashon, fundadó di partido Rudy ‘Ruman’ Ellis tabata presente i e dirigí palabra.
El a kuminsá menshoná ku e momentu ta unu hopi spesial pe. Miéntras e tabata papia, e yu mayó Gerald Ellis tabata huntu kuné pa sostené. Ruman a sigui bisa:”Partido Patriótiko Boneriano (UPB), un partido dushi ku a pasa hopi trayekto. Nos a haña e oportunidat pa sirbi e komunidat. Esaki ta loke e pueblo ta spera di un partido i sigur e lider di partido. UPB a hasi hopi pa Boneiru i polítika di Antias. Partido a forma ku diferente gobièrnu, entre otro mi persona, Ramoncito Booi, Papa Statia i Humprey Wout. Hopi bia ku un persona bandoná un partido i kuminsá algu otro, e no ta logra. Danki Dios partido UPB ku trabou duru a logra surpasá i krese bira fuerte. Komunidat a sostené e partido. Mi ta kontentu ku partido ta selebrá 50 aña di eksistensia i mi ke pa uni forsa, pasobra Boneiru mester di un gobernashon stabil. Hulanda ke yuda sinembargo mester tin gobernante stabil. Tin hopi bon oportunidat i ku seriedat nos por logra hopi pa Boneiru. Mi ta felisitá nos pueblo i ku Dios bendishoná e partido pa kontinuashon,“ tabata entre otro loke Ruman Ellis, fundadó di partido a menshoná e anochi di selebrashon den presensia di tur presente.  

Share This
error: Content is protected !!