KRALENDIJK – Tur kos ta kla pa kampionato 2019-2020 di futbòl ranka sali djabièrnè awó 25 di òktober 2019 den Stadion Antonio Trenidad na Rincon mitar di nuebe anochi.

Esaki e presidente di FFB, sr. Luti Balentin, a duna di konosé durante un konferensia di prensa djamars mainta.

Huntu ku sr. Balentin, tabata presente sr. Hubert ‘Ibi Panchita’ Pikeri, ku ta na kabes di e kuerpo di rèfrinan di nos isla.

Tabata sr. Balentin ku a habri e enkuentro ku prensa, dunando bastante informashon na prensa.

Honor a toka na e dos ekiponan Juventus i Vitesse pa habri e kampionato.

E aña aki e kampionato a bai dilanti ku dos ekipo, di 8 ekipo den e kampionato último, e próksimo temporada ta konta ku 10 ekipo ku ta den e kampionato 2019-2020 ku ta kuminsá djabièrnè 25 di òktober 2019, despues ku djárason último, promé ku e final di Super Cup entre Real Rincon i Estrellas, tabatin desfile i seremonia di e apertura ofisial di e kampionato den Stadion Antonio Trenidad na Rincon.

Sr. Balentin mas aleu a duna bastante informashon, entre otro di e kantidat grandi di traspaso ku a tuma lugá pa ku e kampionato ku tei kuminsá.

Pa loke ta traspaso di un ekipo pa otro, tabatin un total di 82 traspaso i un total di 48 inskripshon.

Esaki ta nifiká, ku pa e próksimo temporada tin bastante kambio den e ekiponan, di kua tin ekiponan ku a pèrdè i haña hungadó i otronan ku a haña hungadó aserka.

Sr. Pikerie durante e enkuentro a bisa ku tin sufisiente rèfri ku por guia e kampionato fo’i kuminsamentu te final sin ningun problema di falta di rèfri.

Tin alrededor di 8 rèfri aktivo i dos pendiente dado kaso nan tin ku drenta akshon pa e kampionato por sigui sin problema.

Tambe t’asina ku tin bia lo por hasi uso di rèfrinan di Kòrsou ku bin traha un ratu na Boneiru, pa nan tambe yuda dirigí e partidonan di kampionato.

No t’asina si ku FFB lo tin ku bai paga o sea tin gastunan ku e rèfrinan di Kòrsou, sino ku dado momentu ku nan ta riba Boneiru, ta pidi nan pa yuda ya no ta keda mira mesun karanan ta dirigí e partidonan di kampionato. Rèfrinan ta trein un pa dos bia pa siman pa keda mantené nan kondishon pa no tin problema durante weganan

Pues tur kos ta kla pa e kampionato ranka sali djabièrnè 25 di òktober 2019 den Stadion Antonio Trenidad na Rincon, mitar di nuebe anochi.

Nos ta deseá e ekiponan den e kampionato tur klase di éksito, meskos tambe e federashon di futbòl bou di presidensia di sr. Ludwig “Luti” Balentin.

Share This
error: Content is protected !!