KRALENDIJK – Awe tabatin entrega di sertifikado pa un grupo di persona ku a sigui un kurso di guia pa turista. E kurso tabata guia pa e konosido Sue Felix i e asistente Brian Albus. Promé ku a hasi entrega di sertifikado na e kursistanan Felix a dirigí palabra pa e okashon. Entre otro el a konta kiko e grupo a siña, esta kon pa atendé ku turista. El a menshoná ku e grupo tabata tremendo, tur hende a uni traha huntu durante lèsnan. “Hopi importante e forma kon e hendenan a funshoná. Diferente persona ku no ta Boneriano huntu ku e yu di tera, a sigui e kurso ku éksito. Awor nan tin konosementu amplio pa atendé ku turista. Despues a papia Brian Albus e persona ku Sue a prepará pa kontinuá ku kurso pa guia pa turista. Albus a menshoná ku ta un plaser pa a atendé ku e grupo di kursista. “Kos a kuminsá kaminda tur hende tabata poko reserva i ku tempu nan a kustumbrá i bira un famia. Tur kos a kana dushi dushi manera ta bisa te final ku éksito.” Seguidamente a papia Jían Magdalena, kordinadó di kursonan di Forma. El a menshoná ku tabata notabel ku e kursistanan ta hopi interesá den e kurso i a logra pas’é ku éksito. Pa promé bes Felix i Fundashon FORMA a organisá e kurso huntu. Despues a pasa pa entrega di sertifikado pa kursistanan, e kurso ku a kuminsá for di 6 di sèptèmber 2019.


Share This
error: Content is protected !!