KRALENDIJK – Djaluna 28 di òktober a tuma lugá apertura ofisial di ofisina nobo di NGO Platform. E ofisina nobo ta situá na kaya Amsterdam 23. E edifisio kaminda ta Kámara di Komersio, na e skina ta ofisina nobo di NGO Platform. Lianne Domacasse a dirigí palabra na tur presente. El a splika ku awor tin un edifisio nobo mas espasioso, loke ta nesesario pa e organisashon. “Mas organisashon por hasi uso di e fasilidat ku tin awor na ofisina di NGO Platform. Despues di trabou fuerte awe nos ta kla ku e edifisio nobo,” Domacasse a menshoná. El a presentá e tim nobo ku ta forma parti di NGO Platform.    

Despues a kontinuá ku kòrtamentu di sinta di e edifisio nobo i despues tur por a drenta e ofisina i tuma nota di e diferente departamentunan ku tin den e edifisio. Den e ofisina tin un sala spesífiko pa reunion, i Dennis Martinus a dirigí palabra pa esnan presente den e sala. El a menshoná ku nan deseo ta pa Boneiru ta un isla kaminda hopi hende ta hasi trabou boluntario. “Nos ta kuminsá na nos mes ku un edifisio ku mas espasio pa por duna e servisio nesesario. Nos ta bai stimulá pa hende hasi algu boluntario. Spera denter di 5 pa 10 aña, kada suidadano ta den un organisashon boluntario i kontribuí ku un ora pa trabou na komunidat, “entre otro Martinus a menshoná. Despues a kontinuá ku un show di baile di FKPD. Kombinashon di potrèt entre otro ta ilustrá momentu ku Diputado Nina den Heyer i Miss Tourism 2019 Raysantaly Coffie a kòrtá sinta.  

 

Share This
error: Content is protected !!