KRALENDIJK – Richard i Iris Molina, hopi desgustá a aserka un reportero di Radio Live 99.9 FM, djis despues ku nan a risibí sertifikado di un kurso di ‘Guia pa Turista” ku nan a pasa ku éksito. Ta trata di un kurso ku Sue Felix huntu ku Brian Albus a duna pa promé bes na Fundashon FORMA. Un kantidat di persona, mas ku 20 a pasa e kurso ku éksito i awor nan por kontinuá ku loke nan ta hasi, esta hasi paseo ku turista i papia ku nan tokante Boneiru. Famia Molina a aserka e reportero di Radio Live 99.9 FM i a ekspresá nan mal kontentu loke a sosodé. “Nos ta kore ku turista ku un bus i a komprondé di TCB, ku nos mester pasa e kurso ariba menshoná pa por ehersé e funshon komo guia pa turista, loke nos a kumpli kuné. Awor ku a finalisá e kurso, a informá nos ku no por kontinuá ku e trabou pasobra ta bai kambia e sistema dentro di poko. Esaki ta loke Delno Tromp di Tourism Corporation Bonaire (TCB), kende ta mènedjer interino di TCB a bisa nos. Pues tur nan esfuerso i sèn ta embano, pasobra nan no por haña e lisensia pa atendé ku turista, ”pareha Molina a konta. Nan a sigui bisa: ”E kos aki a kousa nos hopi doló. Un desapunto total. Nos a hasi hopi invershon, i awor ta bisa no por kontinuá ku e trabou ku nos ta hasi pa por sobrebibí. E pregunta ta dikon e otronan si ta haña lisensia, kendenan a pasa e mes un kurso ku nos. Resientemente nos a papia ku diputado Elvis Tjin Asjoe, kende tambe a konsehá nos pa hasi e kurso ku nos a finalisá awor. Nada tabata bèrdat, pasobra nos no por kontinuá. Nan a yama nos ilegal pasobra nos no tabatin sertifikado. Awor nos a hasi tur esfuerso i a logr’é, tampoko no ta bon,”e famia a menshoná hopi desgustá i emoshoná. 

Radio Live 99.9 FM a papia ku mènedjer interino di TCB Sr. Delno Tromp i Rolando Marin.
Nan a menshoná ku bèrdat ta bai tin kambio den e struktura di esnan ku ta atendé ku entre otro bendementu di kos ku turista den Parke Wilhelmina i esnan ku ta transportá turista di un sitio pa otro na Boneiru, momentu ku nan bishita Boneiru ku barku krusero.

“Mester strukturá e situashon ku e meta pa e ta mas kontrolá. Mi a papia ku famia Molina i a splika nan ku aparte di kambia e struktura, nan mester aserka sea BACA ku ta e organisashon ku ta atendé ku bendementu di kos den Parke Wilhemina i BEA ku ta esnan ku ta atendé e parti di transportá turista di barku krusero,” Tromp a menshoná. Nan a sigui bisa: ”Promé kos famia Molina mester hasi, ta aserka un òf tur dos organisashon ariba menshoná. Tur hende ku tin stènt mester ta miembro di un organisashon i ta paga pa nan por bende kos. Meskos ta konta pa esun ku ta transportá turista. Tromp a bisa pa loke ta trata e kurso loke nan a pasa ku éksito ta bon i korekto, i awor tin ku kontinuá afiliá sea na BEA of BACA pa nan por ta legal i sigui ku nan tarea. Tin mas hende ku deseo pa atendé ku turista, sinembargo tin regla i mester kumpli kuné, ”Tromp a finalisá bisando.

Share This
error: Content is protected !!