KRALENDIJK – Djamars 5 di novèmber a tuma lugá un enkuentro ku prensa, yamá pa Komishon di Sanikolas Boneiru ku ta atendé e fiesta grandi di yegada di e hòmber Santu.

Direktor di Maduro & Curiels Bank (MCB) Leonard Domacasse a dirigí palabra komo promé persona i a menshoná ku ta un honor pa nan ta forma parti di e tim ku ta organisá e fiesta di yegada di Sanikolas. “Huntu nos ta organisá un fiesta ku ta spesialmente pa tur mucha, huntu ku nan mayornan. Aña pasa a amplia e aktividat. Promé dia na Playa i siguiente dia den Bario di Rincon. Mi ta yama pabien na e organisashon ku ta hasiendo un tremendo trabou, organisando e fiesta grandi aki pa nos muchanan. MCB sigur ta sigui kontribuí pa sostené e fiesta di yegada di Sanikolas, e direktor di MCB a menshoná.

Seguidamente a papia Tino de Palm di Komishon Sanikolas Boneiru. “Sanikolas ta na kaminda i preparashon ta den ‘full swing’. Un fiesta ku sigur pa hopi tempu kaba nos ta selebrá. Un fiesta ku grandi i chikí te ahinda ta disfrutá di dje. 2019 ta di 3 aña ku Komishon Sanikolas Boneiru i “WeDoe” ta organisá e yegada di Sanikolas. Pa ser franko, sin e spònsernan amigu di Sanikolas, nos no por organisá e fiesta grandi aki. Sanikolas ta pisa suela di Boneiru dia 23 di novèmber, 10’or di mainta. E barku ku Sanikolas i pitnan ta mara na waf Chiku Mercelina. Diputado Nina den Heyer i Lito, e amiguito di tur mucha, ta topa ku nan na momentu ku nan pisa suela riba waf. Despues di baha for di boto, Sanikolas i su Pitnan ta sigui den un parada rumbo pa e lugá di stashoná outo patras di Parokia San Bernardo, kaminda e fiesta ta tuma lugá. Durante parada tin diferente show i tokamentu di brasbènt. Den kurá di skol ta kontinuá ku e selebrashon grandi ku diferente presentashon riba esenario. Entre otro baile, kantamentu i e show espektakular ku e Pitnan ta hinkando den otro no por keda’fo!. Hopi kenshi, bon ambiente i hopi alegria nan lo sòru p’e. Despues a dirigí palabra e presidente di “WeDoe” Selimah Agostien. “For di 8’or di mainta por yega na e sitio, kaminda ta bai tin diferente aktividat pa muchanan. Kos pa kome i bebe, wega pa mucha, bounser, pinta kara i hopi mas. E aktividat ta terminá 1’or di mèrdia. Ta bai tin algu èkstra pa nos muchanan. Tur mucha ku hasi aña riba e fecha ku Sanikolas ta yega Boneiru, lo haña un regalo serka Sanikolas. Por manda nòmber di e yu i e lo risibí un regalo riba esenario. Mayor di e muchanan por tuma kontakto ku e organisashon pa medio di ‘Facebook’ bou di e página ‘Komishon Sanikolas Boneiru’. Esnan ku a duna nòmber di e yu por haña regalo riba esenario. Na final di dia Sanikolas i su pitnan lo bishitá nos grandinan na Kas di Kuido i lo pasa den algun bario di Boneiru. E dia siguiente djadumingu 24 di novèmber Sanikolas ta di bishita na Rincon riba plenchi di Fundashon Cocari. E aktividat ta kuminsá 1’or di mèrdia i ta terminá 6’or di atardi. Sanikolas lo ta presente entre 3’or pa 5’or di atardi na e sitio. Esnan ku no logra topa ku Sanikolas i pitnan e dia anterior, por topa nan djadumingu den e bario di Rincon. Esnan ku ta deseá pa pone stènt sea na Playa òf Rincon, por tuma kontakto ku e organisadónan, pa medio di ‘Facebook’ of 770-3414. Komishon Sanikolas na nòmber di tur mucha, ta gradisi MCB i Lito pa kere den e komishon organisatorio. Tur ku di un forma òf otro, ta hasi e fiesta grandi di mucha aki posibel i tur ku ta duna nan kontribushon pa Sanikolas i su Pitnan pisa suela di Boneiru. Sin nan, lo no tin yegada di Sanikolas. For di awor ta invitá grandi i chikí pa bin risibí Sanikolas i su pitnan djasabra 23 di novèmber pa 10’or di mainta.

Share This
error: Content is protected !!