KRALENDIJK – Djamars 29 di òktober último a ensayá ku un avion a kai na Flamingo International Airport (BIA). Radio Live99 a papia ku Sra Rosalinda Balentin kende ta e ‘airport operations manager’. Ta trata di un treinen kon pa atendé ku un situashon kaminda un avion a aterisá i a ‘Crash’. Balentin:” Nos ta hopi kontentu kon tur kos a bai bon, pasobra ta prosedernan ku ta mara na ICAO ku nos mester kumpli i prosedernan ku ta mara den lei Hulandes. Kada dos aña mester hasi algu basá riba kalamidat. Kumpliendo ku esaki ta pa nos ta bon prepará si algu sosodé, ban spera nunka e ta pasa, kada persona sa kon pa aktua i skapa mas tantu bida posibel. E treinen a bai unda nos a simulá ku un avion MD 80 ku mas o ménos 45 hende abordo a konstatá problema i a aterisá inkorekto i a ‘Crash’. Tur instansia ku mester asistí tabata presente entre otro brantwer, kuido, polis, kmar, OLB i esnan di aeropuerto mes. Nos tur huntu ta kuminsá traha riba e kaso i tin sierto tim ku ta keda formá pa atendé ku un situashon asina. Meta ta pa yuda i salba mas hende i kita loke ta riba pista pa por kontinuá ku otro buelonan. E otro gruponan ku mester yega aeropuerto momentu ku algu sosodé tabata presente na e sitio. Ta dependé e treinen ku ta perkurá pa e otronan ta presente òf  nan ta keda na nan pòst i ta yama nan na aeropuerto. Den e kaso aki tur instansia tabata presente, sinembargo ta hasi treinen kaminda ta praktiká e parti di otro instansianan pa kore yega aeropuerto,” Balentin a menshoná. El a sigui bisa:” Ta importante pa hasi e práktikanan pa semper ta bon prepará i mihó posibel. Di e forma aki e hende por dil mas mihó ku e situashon. Kada 2 aña ta organisá un praktiká den kada departamentu. Semper tin praktiká i ta spera nunka algu ta sosodé. Nos a invitá 2 persona di aeropuerto Kòrsou. Nan a opservá kon tur kos a kana den e praktiká i asina realisá kiko ta e puntonan ku mester drecha. Nunka algu manera esaki por kana perfekto.”          

Share This
error: Content is protected !!