KRALENDIJK – FEDEBON después di a organisá trahadónan di e supermerkado Warehouse a hiba negosashonnan intensivo pa logra un kontrakto kolektivo pa e trahadónan. Djabièrnè 1 di novèmber a bira un dia históriko, ya ku despues di mas ku trinta aña a logra firma un CAO pa trahadónan den e sektor aki. Tantu e direktor di Warehouse komo presidente di FEDEBON a ekspresá nan satisfakshon pa e logro aki, kaminda awor e trahadónan ofishalmente tin represesentashon na e empresa ku por sali na nan interés i ku no mester ta asina ku kada trahadó individualmente mester enfrentá e dunadó di trabou. Den e empresa mes tin e shopstewardnan ku regularmente ta den komunikashon ku gerensia i sigur ta e promé yamánan pa atendé kualkier situashon ku presentá den e empresa. Un nota interesante ta e deseo ekspresá pa e direktor pa ban tuma e inisiativa pa yega na un CAO pa e sektor di supermerkadonan. Por sierto un tema ku ya ta riba agènda di USIBO. USIBO ta konvensí ku ta na bienestar di e empresanan, pero tambe na bienestar di sindikalismo na Boneiru si por yega na sera CAO-nan pa sektornan empresarial, manera entre otro sektor di supermerkadonan, sektor hotelero, sektor di konstrukshon, sektor di seguridat, ets. Den un próksimo boletín USIBO lo elaborá riba e bentahanan ku esaki lo por tin. USIBO kier felisitá FEDEBON, e trahadónan di Warehouse i tambe gerensia di Warehouse ku firmamamento di e promé CAO aki. Aki tambe USIBO ta hasi un yamada na tur e trahadónan di e supermerkado ku no ta miembro ainda, afiliá boso mes i demonstrá solidaridat ku boso kompañero(a)nan. Tin mas kos pa atendé riba tereno laboral na boso interés tambe. No para na banda i laga otronan si bai dilanti. UNION ta hasi forsa. Un yamada ta bai na trahadónan di tur otro supermerkado na Boneiru pa nan tambe buska informashon i afiliá nan mes na un di e sindikatonan aki na Boneiru.

Share This
error: Content is protected !!