KRALENDIJK – Awe mainta a inisiá ku e programa di e ‘Kickoff Masterplan 2030 Conference’. Promé ku e parti ofisial di e programa a kuminsá e hóbennan di Byof Arts tabatin e tarea pa komo animador duna nan vishon riba futuro. Un tremendo presentashon kaminda nan a risibí un fuerte aplouso. Seguidamente a papia Glenn Thode, eks gezaghèber di Boneiru i Saignee Evertsz kendenan a fungi komo maestro di seremonia. Nan a splika tokante e programa di e dia i menshoná nòmber di esnan presente for di eksterior i otronan ku ta tuma parti na e ‘Kickoff Master plan 2030’. Seguidamente a dirigí palabra gezaghèber di Boneiru Edison Rijna. El a menshoná ku e ta kontentu di por ta tuma parti na e aktividat ariba menshoná. “Mi ta bai konta algu ku mi a eksperensia i ku hopi di boso sa di dje, Ta  trata di e kantika ku e konosido Rudy Plaate a kanta pa e isla di Kòrsou. ‘Mi ke sa’. El a kanta di ekonomia i diferente kos di 1980, i kiko lo bai ta na aña 2000, “entre otro el a menshoná. Despues a papia diputado James Kroon, ku a elaborá tokante e master plan di tráfiko na Boneiru. Tambe el a papia di e diferente situashon ku nan ke mira kambio, entre otro mantenshon di kaya i konstruí mas kaya ku ta di tera, hasi nan di asfalt.
Seguidamente a dirigí palabra diputado Nina den Heyer. El a konta kon tempu e tabata biba na Hulanda i tabata bishita Boneiru tur aña ku fakansi. Despues el a bin Boneiru i a gusta Boneiru hopi. 2002 el a regresá Bonaire despues di a studia den eksterior. “Situashon no tabata den bon direkshon i tabata bon kla ku Boneiru mester a kita for di Kòrsou. Diferente kos no tabata funshoná na òrdu entre otro e parti di salubridat. No tabatin remedi den botika debí na debenan atrasá i mas,”diputado den Heyer a menshoná. El a konta kon e ku su wela tabata bishita otronan, i e wela a bisé skucha di esnan di mas edat. Nan a eksperensia hopi kos den bida i a mira, tende i sa kon pa kana e kaminda di bida mas mihó posibel. Último persona ku a papia e mainta promé a kontinuá e programa ‘Kickoff Masterplan 2030 Conference’ tabata diputado Elvis Tjin Asjoe. E tambe a konta kon el a lanta na Boneiru. El a konta di Miguel Pourier kende a menshoná algun kos ku e a tene na dje. Tambe kon Boneiru a desaroyá i ta awe. “Mi a papia ku algun hende den sala. Bo por tin yen kos bunita planiá. Si no tin ‘Good will’, nos no ta logra nada. Huntu nos por logra hopi mas pa Boneiru. Meskos ta e kaso si Hulanda ta deseá pa traha huntu ku nos i vise versa, kos ta bira mihó.

Kombinashon di potrèt ta ilustrá entre otro posibilidat ku tabatin pa pinta loke ta deseo pa mira den 2030.   

Share This
error: Content is protected !!