KRALENDIJK – Djabièrnè último dos alumno mester a bira hopi malu despues di a usa píldora di XTC. Tur esaki a sosodé riba tereno di Liseo Boneriano na kaya Amsterdam. Skol ku ta kai bou di Komunidat di Skol Boneriano (SGB). E alumnonan aki tabata aktua bastante straño. Despues a bin sali na kla ku ta XTC e alumnonan a usa. Polis tambe a presentá na e skol i a bai ku dos alumno warda di polis despues di a haña nan ku e píldora.

Den un reakshon SGB ta informá ku enbèrdat djabièrnè último a haña droga na skol. Den tipo di situashon asina, semper nos ta duna keho na polis. Nos ta sigui dos pista kaminda por tuma tantu sanshon, suspenshon i finalmente e posiblidat pa kita e alumno for di skol i por ofresé yudansa na e alumno i su famia. Droga ta hasi daño na mente i ta trese kuné daño ireparabel, es desir na sesu di nos hóbennan ku ainda ta den proseso di kresementu. Komo skol e aña aki tambe nos lo dediká atenshon i duna informashon tokante esaki. Importante ta pa komo mayor papia ku e yu tokante e peligernan di tantu alkohòl komo droga.

Share This
error: Content is protected !!