PENSHONÁDONAN DEN LUCHA KETU BAI PA NAN DERECHO RIBA NAN PENSHON DI BEHÉS KOMPLÉTU

0 Comment


KRALENDIJK – Gobièrnu di Kòrsou a tuma e desishon pa kita 10% for di e penshon di behes di tur penshonado ku no ta biba na Kòrsou mas. Nan a kita e bonùs di fin di aña també. Un grupo di penshonado bibá na Bonèiru a tuma akshon for 2017 pa rekobrá nan derechonan bèk. Un grupo grandi di penshonadonan na Aruba, liderá pa Sr. Farley Pietersz, tambe a djòin e lucha aki. Esaki ta duna nos lucha mas peso. Penshonadonan di Aruba i na Hulanda tambe ta afektá.

E desishonnan aki ta inhustu i deskriminatorio.

1. Inhustu, pasobra kada empleado públiko i no públiko a paga kabalmente su prima durante su añanan di labór. Awor ku e tin derécho riba loke el a paga p’e, Gobièrnu ta kita esaki sin su aprobashon pasobra e ta biba den eksteriór (esta pafó di Kòrsou). Den boka di pueblo esaki yama ladronisia.

2. Deskriminatorio, pasobra su kolega penshonado na Kòrsou ku a hasi mesun

trabou i a paga mesun prima, sí ta haña su penshon i bonùs kompletu.

Bonèiru també a keda konsiderá komo eksteriór, lubidándo ku fuera di relashonan familiar históriko di mas resién, nos tabata biba sentenares di aña huntu den Antia Hulandes komo ruman, i te awor ketu bai nos ta párti di mesun Reino Hulandes.

Aki na Bonèiru tin mas o menos 340 persona ku tin derecho di risibí penshon di behes for di Kòrsou. Nan tur a kai den e mesun desishon inhustu i deskriminatório aki, inkluso yunan di Kòrsou.

Ta un abúsu grandi kontra nos penshonadonan ku no tin ningun defénsa.

E grupo di penshonado prekupá ku ta biba na Bonèiru i un grupo basta grandi tambe na nos hermana isla Aruba ta sigui lucha pa rekobra nan derechonan bèk.

Atrabes di sr. Michiel Bijkerk e gruponan aki a entama un kaso den korte di prome instansia, ku a tuma luga na sèptèmber aña pasa (2018), di kual e sentensia no a kai na nos fabor. Nos a disidi pa apela e sentensia pa bai den korte superior (esta Hof van Justitie).

E kaso lo tuma luga aki na Boneiru:

Fecha : Djamars awor 12 di novèmber 2019.

Ora : 15:30 or.

Luga : Sala di Korte di Hustisia, Fort Oranje, Bonaire.

P’esei nos ta pidi TUR penshonado ku ta enbolbí den e situashon aki, ku a firma pa sostene e lucha aki i ku por yega, pa akudí na sala di korte di Hustisia, pa por sigui e kaso di aserka.

Boso sostén ta altamente apresiá!

Huntu nos ta logra.

Share This