KRALENDIJK – Despues di kantidat di reakshon relashoná ku drechamentu di kareteranan, Radio Live 99.9 FM a papia ku Diputado Pablo James Kroon relashoná ku e remarkenan. Hopi outomobilista spesialmente ta reklamá tokante kamindanan na Boneiru. E asuntu di drecha kaya por bai fásil segun nan. E problema ta e asuntu di sakamentu di tera, esta fundeshi pa yen’é di nobo. E kos aki no ta nesesario. Un Boneriano bibá na Hulanda a konta ku aya simplemente ta ‘vrees’ un kaya i pone un kapa nobo di asfalt. Meskos tabata e kaso ku kaya Macario ‘Cai’ Sint Jago. Algun aña pasá a ‘vrees’ e kaya i pone un kapa nobo i ainda e kaya ta bon. Den e área aki e tera no ta stabil i ta notabel ku e kaya a keda mas mihó ku otronan ku a drecha ku si a kuminsá plama for di otro. E asuntu di saka fundeshi lógikamente ta hopi mas karu ku simplemente ‘vrees’ i pone un kapa nobo di asfalt. Si ta planiá pa drecha tur kaya na Boneiru ku ta den mal estado, ku ta sigur 70 porshento, sin konta esnan di tera ku ta rekerí asfalt, lo dura un eternidat pa drecha tur. Si tur kaminda mester koba saka fundeshi aki 100 aña ainda ta drecha kaya na Boneiru sin yega un final. E ta hopi kostoso i ta tuma hopi tempu. Kaya Macario Sint Jago ta e ehèmpel mihó ku Boneiru tin. Esnan ku supuestamente tin konosementu di e trabou i gobièrnu i otronan komo konsehero niun no ta mira esaki?
Otro kos ta ku e asuntu di koba kanal duars den kaminda i no por sera esaki stabil. Mester pone regla si un kompania no por hasi e trabou bon, duna un otro e tarea. Kisas ta bon pa manda e kompania ku ta hasi e trabou aki un kurso kon pa habri i sera un kanal duars riba kaya. Mas ku 90 porshento di kanal ku a drecha na Boneiru ta inkorekto. Radio Live 99.9 FM a papia ku diputado James Kroon relashoná ku e remarkenan ku tin den pueblo. Diputado Kroon a reakshoná bisando ku Hulanda ta pone fondonan disponibel pa drecha kaminda. Nan a proponé pa saka e fundeshi i pone nobo promé asfaltá un kaminda. Pa e motibu aki ta rekonstruí tur kaya den e mes un konsepto.  

Share This
error: Content is protected !!