KRALENDIJK – Djadumingu 15 di desèmber Fundashon Nawati ta organisá selebrashon di 10 aña Dia di Nort’i Saliña.

E selebrashon ta bai tuma lugá riba e tereno i den e edifisio di Sentro di Bario Nort’i Saliña i ta kuminsá for di 11 or di mainta te 12 di anochi. E inisio di e selebrashon lo ta na Misa di Coromoto kaminda ta pidi bendishon pa e bario, su habitantenan i Fundashon Nawati. Despues di invokason na misa e selebrashon lo kontinuá na Sentro di Bario Nort’i Saliña. E programa lo kontené e parti protokolar ku presentashon di baluarte di bario, apertura di e edifisio di Sentro di Bario despues di un restorashon i tambe aktividat informativo, deportivo i musikal. Den kuadro di e di 2 lustro di Dia di Nort’i Saliña lo tin un seri di torneo di entre otro dominó, futsal, biar i bolas ku lo kulminá durante e selebrashon. Tambe un grupo di trahadó di garoshi lo partisipá i presentá un tayer di traha garoshi i demostrá korementu di garoshi pa públiko. Riba e tereno di Sentro di Bario tin espasio pa harma bar i diferente stènt pa entre otro kushina, boka dushi, bon kuné i wega.

Fundashon Nawati ta bai lansa aktividat di promoshon di e selebrashon di Dia di Nort’i riba medionan sosial di manera ku públiko por ta bon informá di e programa di selebrashon di e di 2 lustro di Dia di Nort’i Saliña. Nos ta pidi tur norteño i tur otro pa keda pendiente pa mas informashon di e selebrashon di 10 aña di Dia di Nort’i Saliña.

Share This
error: Content is protected !!