Kralendijk – Pa konmemorá Lantamentu di Katibu di 10 di novèmber 1834 bou di guia di Martis di Katalina Janga, Gobièrnu di Bonaire pa medio di Sekshon Kultura Arte Literatura (SKAL) for di aña 2003 a introdusí e asina yamá Chapi di Lucha.

Ku e entrega Chapi di Lucha gobièrnu di Boneiru/ SKAL ta duna rekonosimentu na personanan ku di un òf otro forma ta (a) destaká den trabounan pa adelanto di komunidat Boneriano riba tereno sindikal i esun sosial kultural.

Djabièrnè 8 di novèmber SKAL a duna rekonosimentu na dos siudadano.

Sr Felix Thomas hefe interino di SKAL na nòmber di gobièrnu di Boneiru a hasi entrega di chapi di Lucha na sr. Marcelo Gonzalvo Antony i sr. Ronald Hipolito Janga.

Marcelo Anthony a keda rekonosé pa su trabounan sindikal den ABVO. Ronald Janga a keda rekonosé pa su trabou nan kultural i deportivo den nos komunidat.

Biografia di Marcelo G. Anthony.

Marcelo G. Anthony a keda rekonosé pa su trabounan sindikal den ABVO.

Sr. Anthony, mihó konosí komo “ Chaly” a nase dia 16 di yanüari 1950 na Rincon Boneiru. Ku su 14 aña e la biba na Kòrsou I na mei 1981 e la regresá su isla natal.

Una bes bek na Boneiru e la bira miembro hopi aktivo di Bonaire Jaycees i a partisipá den diferente proyekto e.o. festival di kanto na Lac, rekoudashon di fondo, Management Community Development. Huntu ku su otro miembronan di Jaycees na 1983 nan a Sali Ganadó den e kompetensia pa e mihó proyekto pa komunidat na Antia Hulandes.

Na 1983 Chaly Anthony a drenta direktiva di Sentro di bario Nikiboko komo presidente te ku 1989.

Den su funshon komo presidente e la organisá hopi aktividat e.o tafeltennis, lèsnan di kanto, kuarto i blòkflùit. Tambe lèsnan di kose, kushina i pintamentu. Sr. Anthony ta esun ku a reaktiva e proyekto deportivo yama Nikiboko Teener Machine, ku pa basta aña no tabata funshoná. Ku yudansa di FAJ i Sede Antia e proyekto aki a kristalisá ku un kancha di deporte. Pa hasi bario di Nikiboko ainda mas bunita durante dianan di Pasku sr. Anthony a kuminda ku un proyekto nobo pa dekorá e kasnan den bario ku lusnan di Pasku. Anthony tabatin hopi atenshon pa aktividatnan kultural den su bario manera selebrashon di simadan, San Pedro i San Juan. Tambe e tabata un di e fundadónan di e federashon di sentronan di bario FESBO. Resultado di tur su esfuersonan ta ku su sentro di bario a sobresalí riba tur e sentronan di bario.Bou di guia di Anthony e proyekto pa 60 plùs a kuminsá den e sentro di bario aki. E inisiativa aki a haña bon akohida den e otro sentronan di bario. E proyekto aki a saka hopi di nos grandinan for di nan isolashon..

For di 1997 sr. Anthony tabatin vários funshon den direktiva di ABVO i a keda skohe komo presidente di 2009 te ku 2018. Anthony a firma e akto di fundamentu di Abvo Bonaire i tambe konstrukshon di un edifisio nobo ku pronto ta kedando kla. Anthony ta tambe un di e fundadornan di Usibo i a karga e presidensia 2012 pa 2017. Bou di

su maneho a instituí e diálogo sentral tripartit. Aktualmente e ta fungi komo konsehero di e union sindikal.

Na 1984 chaly Anthony a kuminsá su envolvimentu den karnaval komo miembro di Bonaire Jaycees. Na 1995 huntu ku diferente otro persona e la lanta Fukabo i te ku aña 2000 a fungi komo presidente. Pa tene su mes na altura di tur loke ta pasa den Mundo tokante di karnaval e a bira miembro di FECC i a partisipá na diferente kongresonan den eksterior. Ketu bai e ta duna su aporte na karnaval tantu komo partisipante i su programa radial.

Otro inisiativa di sr. Anthony ta pa pone den kada bario un plattegrond ku ta indiká unda kada kaya ta keda. E promé bòrchi a toka e bario di Rincon.

Den periodismo tambe Anthony tabata aktivo komo koresponsal di La Prensa, último Noticia, Bala i nobo.

Na 2010 su Mahestat Reina Beatrix a kondekor’é komo lid in de orde van Oranje Nassau.

Den deporte tambe e a duna su granito komo sekretario di FFB.

Biografía di Ronald Hipolito Janga

Ronald Janga a keda rekonosé pa su trabou nan kultural i deportivo den nos komunidat.

Ronald Hipolito Janga, mihó konosí komo Roly, a nase na Kòrsou riba fecha 30 di yanüari 1966 for di mayornan legítimo Boneriano, ku pa motibu di nan trabou a establesé nan mes na Kòrsou.

Na edat di 6 aña, komo di 8 yu di un famia di 9 yu, Roly a bin biba na Bonaire serka un ruman di su mama.

Aki na Bonaire Roly a pasa un parti importante di su hubentut. Aki el a bishitá skol básiko na Rincon i 2 aña di Technische School na Playa. E tabatin su amigunan den Rincon, e tabata den grupo di Scout i tambe e tabata hunga bala. Serka tur hende Roly tabata konosí komo un hóben apart i ehemplar ku bon manera i bunita disiplina.

Despues ku el a bai bèk Kòrsou, na edat di 14 aña, su mama a bin fayesé. Pues na un edat relativamente hóben el a hañ’é ta bira zelfstandig.

Na Kòrsou el a sigui su studio na Technische School Sint Jozef kual el a terminá ku diploma di Machine Bankwerken i Constructie-Techniek. Despues el a sigui un kurso pa spesialisá su mes komo Elèktrishèn.

Di 1983 pa 1989, Roly a traha na Kodela Kòrsou i for di 1989 te 1990 el a traha na Web Bonaire pa despues bai bèk Kodela na Kòrsou te aña 1994.

Despues di a lókia entre Kòrsou -Bonaire i Bonaire-Kòrsou, Roly a establesé su mes huntu ku su yu hòmber di 7 aña den aña 1994 na Bonaire unda el a keda empleá na Web. Aki e mes tabata tata i mama pa su yu ku e kier a duna un

edukashon ehemplar lokual a logra tambe. Aktualmente e yu aki ta empleá na Telbo i ta tata di dos yu.

Roly a hasi su mes kerí i respetá den komunidat di Bonaire. Den su trabou tur hende tabata konosé komo un persona serio i responsabel. E tabata forma parti di Scout komo hóben, despues komo lider. Riba tereno deportivo Roly tabata hungadó di beisbòl na Kòrsou i na Bonaire e tabata aktivo den Real Rincon i aktualmente e ta forma parti di un ekipo Veterano.

Desplegando su trabounan pa Web, e ta hañ’e den un aksidente di trabou hopi grave i ku mester a apuntá un brasa na yanüari 2007. Su parti spiritual fuerte a yud’e superá e periodonan difísil ei.

Roly tin un karakter fuerte, e ta un persona duidelijk den su opinionnan, tambe e por argumentá i formulá su pensamentunan hopi kla.

Roly i su partner Shaiderline ta okupando nan mes ku edukashon di nan yunan 6 i 3 aña. Tin momentu ku e pareha aki ta vang op e niëta di Roly.

Den komunidat di Rincon Roly ta kla pa yuda tur hende i ke mira nos hóbennan riba un bon kaminda. Aktualmente Roly ta okupá su mes ku agrikultura i krio di bestia. Tambe e ta kompañá personanan ku ta bai afó pa tratamentu médiko, manera ta e kaso na e momentu aki.

Share This
error: Content is protected !!