KRALENDIJK – Djabièrnè último vise-presidente i sekretario di SIMABO, asistí pa sekretario di USIBO a tene un enkuentro hopi fruktífero ku direktor di Komunidat di Skol. A interkambiá riba e diferensha di opinion ku a surgi en kuanto e asina yamá Vak-Mavo. Den un forma hopi profeshonal e partidonan a repasá e prosedura i proseso ku a tuma lugá relashoná ku e intenshon di bin ku un pensamento inovativo pa loke ta trata enseñansa riba e nivel di MAVO. Básikamente e pensamento ta pa entrodusí un materia práktiko adishonal na e kuríkulo aktual. Partidonan ta riba e mesun liña pa ku inovashonan ku mester tuma lugá den nos enseñansa pa asina kontinuamente sigui ku e desaroyonan ku ta tumando lugá den mundo i ku nos komunidat tambe ta sinti e efekto. A palabrá ku lo bai envolví SIMABO mas intensivo den e prosesonan aki pa asina buska un sosten amplio bou di e dosentenan, pero tambe bou di mayornan i otro instansianan yegá na enseñansa. Mesora a probechá di papia tokante e “dertiende maand” ku a yega na akuerdo kuné na mesa di Konsulta Sektorial i ku tin ku konta tambe pa tur dosente den henter enseñansa na Boneiru. USIBO ta kontento ku un biaha mas e forsa di diálogo a keda manifestá i tambe e rèspèt ku a keda demonstrá entre partidonan ku na mesa di diálogo ta partnernan igual.

Share This
error: Content is protected !!