KRALENDIJK – Djabièrnè último servisio di Skal a otorgá e Chapi di Lucha na Marcelo ‘Chaly’ Anthony. Un rekonosemento meresí pa su trabounan inkansabel riba tereno entre otro di sindikalismo. Kompañero Chaly, despues ku Eric Tjie-tjie a fayesé ku entusiasmo i dedikashon a tuma over e funshon di presidente di ABVO i ehersé e funshon aki te ora ela pasa e batuta pa Robert Sances. Den e edifisio na Yato Bako, Chaly tabata un símbolo ku banda di su trabou komo sindikalista tabata esun ku tabata perkurá pa e edifisio semper ta den un bon estado, manteniendo e edifsio tur ora limpi. Hopi aktividat a keda organisá den e sede di ABVO i últimamente nos por a tuma nota ku a konbertí e edifisio den un skol “Aqua Marin”. Den lantamento di USIBO tambe Chaly a duna su kontribushon i aktualmente e ta miembro di e Kuerpo di Konseho di USIBO. Hopi ta e CAO-nan ku Chaly a sinta na mesa negoshá o renobá i bou di su liderato por a tuma nota ku e sindikato ABVO a krese. USIBO ta orguyoso ku un di su miembronan ko-fundador a risibí e mérito aki. Un pabien ta bai na Chaly i naturalmente na tur su famia ku semper a sostené den su trabounan pa su próhimo den sindikato.

Share This
error: Content is protected !!