Sekretario di estado i entretantu minister Knops resientemente a a anunsiá ku dia 21 di òktober 2020 St. Eustatius lo bai urna elektoral pa loke ta trata su gobièrnu lokal. Manera konosí e gobièrnu nashonal (Hulanda) a intervení den e gobièrnu lokal i a desolvé esaki. E anterior tabata nesesario pasobra tabata tin desórden, mal maneho finansiero, pero tambe diskriminashon, intimidashon, menasa i insulto, arbitrariedat i búskeda di poder personal akosto di e habitantantenan di St. Eustatitus. 

Ku otro aña lo tene elekshon lokal sin mas ta un bon notisia i sufisiente motibu pa organisashonnan polítiko na St. Eustatius kuminsá prepará pa esaki. Den e konteksto aki mi persona a keda invitá komo oradó prinsipal pa duna informashon na esunnan ku ta interesá pa drenta polítika, pa loke ta trata e múltiple fasétanan di e funshon di ta un miembro di konseho insular i e diferente instrumentonan ku e tin na su disposishon. Tambe mi a kompartí mi eksperensia ku mi a atkerí pa loke ta trata nos lei di entidat públiko BES (WolBES) i tambe e lei di finansa BES (FinBES), i su diferente interpretashon di nos banda ku ta afektá e interakshon entre konseho insular i kolegio ehektivo. 

Loke ku mi a ripará sinembargo despues ku a papia ku diferente habitante di St. Eustatius ta e hecho ku mayoria hende ta hopi tímido i ta preferá di no ekspresá nan opinion. Tambe mi a konstatá ku hopi hende ta di opinion ku e proseso di desishon di e komisario di gobièrnu no ta transparente. Den un artíkulo den ‘Statia News’ por èhèmpel un eks diputado di partido Demokrat ta reklamá ku e manera kon a instituí e konseho komunitario no ta sufisientemente kla. No tin un lista di desishon di reunionnan di e konseho aki òf alomenos esakinan no ta disponibel ‘públikamente i pa miembronan di e konseho no ta kla kon nan puntonan ta keda inkluí den e proseso di desishon. Straño ta ku aparerentemente e miembronan di e konseho a keda prohibí pa konsultá ku tersernan pa ku nan trabao den e konseho. 

For di diferente publikashon akadémiko pa ku demokrasia por keda dedusí ku tin varios desafio pa desaroyá demokrasia despues ku esaki a sufri un kaida manera a sosodé na St. Eustatius. Ta proponé en partikular ku urgentemente mester restourá e bashi den orden ku a keda atras despues di e kaida i tambe mester restourá e kapasidat. Imperativo ta pa no solamente impoderá òf duna e habitantenan i nan organisashonnan independiente e chèns pa partisipá, pero tambe pa duna institutonan gubernamental sufisiente medio, i tambe treinen i reorganisá un ke otro, pero mas importante ta pa duna e sentimentu ku esaki ta un mishon ku mester hasi huntu. Ku otro palabra e sentimentu di ta envolví, esdesir e pueblo, mester ta un obligashon. 

Na 2015 a base di artíkulo 205, artíkulo 204, insiso 1 di WolBES un instrukshon a keda duná na e representante di Reino pa a korto plaso, instituí un grupo piloto kaminda gezaghèber, diputadonan, i e sekretario di e entidat públiko di St. Eustatius tin asiento. Bou di presidensia di e representante di Reino a kompilá un plan di akshon pa trese na òrdu, i bou di kontrol e problemátiko gubernamental di e isla di St. Eustatius. Den e plan di akshon a hasi komprensibel na ki manera i konkretamente lo hasi e modifikashonnan nesesario pa realisá un bon funshonamentu di e aparato gubernamental i su amtenarnan. E realisashon di plan aki i e metanan menshoná mester a keda realisá no mas tardá ku dia promé di yanüari 2018. E grupo piloto mester a duna guia na un ehekushon ordená di e plan. Tur esaki lástimamente no a duna e resultadonan deseá pa St. Eustatius. 

Na febrüari 2018 Hulanda finalmente a intervení i a enkargá su mes ku e gobièrnu lokal i e rasonnan ta indiskutibel, pero ku mester a yega dje leu ei Hulanda tambe por kulpa su mes pa esaki.  Despues di 20 luna sinembargo e gobièrnu lokal ainda no a keda re-establesé. Internashonalmente mirá e ekspektiva ta ku Hulanda mas pronto ku ta posibel lo restourá e órden i huntu ku e habitantenan di St. Eustatius traha riba kapasidat i otro defisiensianan pa asina generá un sentimentu ku ta huntu ta hasi esaki. Komo tal e eksesonan atministrativo i desórden ku a tuma lugá den pasado resien, efektivamente por keda kombatí den futuro. 

Dor di ekskluí habitantenan i nan organisashonnan independiente entre otro tambe esunnan polítiko, lo tin su rekuperashon riba e komunidat di St. Eustatius pasobra nan lo bira apátiko i lo pèrdè konfiansa den nan mes hendenan. Pio ainda ku ta primintí elekshon lokal pero e konseho insular nobo eskohí no tin outoridat pa apuntá diputadonan i konkretisá un presupuesto pa e isla. Tambe no ta sufisientemente kla na ki manera e demokrasia lokal riba término lo keda establesé. 

E peliger e ora ei lo ta hopi grandi ku ningun partido polítko òf organisashon lo partisipá na e elekshonnan di otro aña. No tin ningun sentido. Sí lo ta un muestra di bon gobernashon si e demokrasia lokal keda re-establesé kompletamente i e gobièrnu lokal bou di supervishon kwalifiká estrikto, por kontinuá ku e ‘nation building’. E konfiansa mutuo no tin ningun chèns pa prosperá na St. Eustatius si su habitantenan i nan organisashonnan independendiente no ta keda inkluí profundamente. 

E promoshon di demokrasia, entre otro e rekuperashon rápido i funshonamentu efektivo di e demokrasia lokal, i e fortalesamentu di bon gobernashon ta komponentenan klave di initiativanan di Nashonnan Uní pa ku biba atrobe na pas ku otro den un komunidat ku a sufri un deterioro demokrátiko. No tin duda ku Hulanda ta afirmá esaki kompletamente pero pa mantené e balor propio di habitantenan di St. Eustatius Hulanda por aselerá un tiki mas. Pa esei Hulanda di inmidiato mester kambia rumbo i restourá demokrasia lokal i fortalesé bon gobernashon simultáneamente i no ku e uno (restourá demokrasia lokal) ta dependiente di e otro (fortalesamentu di bon gobernashon) manera aparentemente ta e intenshon. 

dr. Willem A. Cecilia



Share This
error: Content is protected !!