Kralendijk – E popularísimo banda “Fenty Music” a lansa un piesa nobo titulá “Ko’i Kurason” den bos di Gerald Alberto. E piesa aki a keda komponé i areglá pa e duo “Mahestral” èx Q-Sign, Faysel “Kabala” Francisco i Derrel “Titi” De Palm. Dos músiko ku no mester di niun klase di introdukshon i ku ta rekonosé pa nan talento i nan moveshonan den e area músikal.

Mester remarká ku “Fenty” sigur despues di nan promé presentashon na Kòrsòu, den festival di Tumba 2019, a sigui demostrá nan stabilidat i ta kosechando hopi eksito aki na Boneiru.

Esaki bo por midi’é na e tradishon di kada bula un djabièrnè “Lit Fridays” ku ta unu súmamente popular i gustá bou di nos pueblo Boneriano. Fenty sigur ta deleitando su públiko ku músika riba nivel hopi haltu i ta yenando tur klubnan nokturno.

E piesa “Ko’i Kurason” sigur lo ta un di e bòmnan den fin di aña aki ku mester bai tene kuenta kuné. Nos a komprendé ku tin negosashonan kaba andando i ku Fenty lo por ta pronto rumbo pa Kòrsòu i tambe Aruba pa algun presentashon bailabel. Keda pendiente pa mas di e agrupashon en kuestion.

Share This
error: Content is protected !!