KRALENDIJK – Djadumingu 10 di novèmber último tabata dia di ‘Mantelzorg’. Relashoná ku e selebrashon aki a tuma lugá un aktividat organisá pa e organisashon di “Mantelzorg Bonaire”. Riba e dia aki a pone ‘Mantelzorgers’ i alabes nos grandinan den ‘spotlight’ mientras nan por a disfruta di un atardi ku nan a wordu malkriá. Durante e aktividat tabatin oportunidat pa hasi diferente kos entre otro masashi, pela, pedicure i tabatin kos di kome i bebe pa tur presente. Sra Diana Thomas, e persona na kabes di e organisashon a papia durante e aktividat i a menshoná ku hopi hende den komunidat tin bèrguensa di pidi yudansa. “Nos mes ta tuma e peso yuda un otro debí ku tin bèrguensa pa sali i aserka un instansia ku por duna un man asina yuda kaminda ta nesesario. Nos mester yega na e informashon, tende loke ta e nesesidatnan, pa por aserka gobièrnu. Ku prueba nos por atendé esaki ku gobièrnu i Hulanda pa yudansa, ”Thomas a menshoná. Despues a papia diputado James Kroon kende tabata presente i el a menshoná ku ta un tremendo inisiativa. “Nos tambe ta kere den e organisashon. Kuido di ser kerí ta hopi importante. Esei ta nifiká ku kada un di nos ku ta perkurá pa un ser kerí ta di aploudí. Gobièrnu ta duna tur sosten i atenshon pa loke boso ta hasi pa un otro, ”diputado Kroon a menshoná.

Share This
error: Content is protected !!