KRALENDIJK – Djasabra tras di lomba Nerio Mercelina i esposa Leticia a selebrá nan fecha natal. Nerio a kumpli 95 aña di bida i Leticia 90 aña di bida. Famia a pidi un misa spesial pa e pareha na parokia La Bírgen di Coromoto. Durante predikashi pader Alphonsus Baak a menshoná ku tiki hende ta bai misa na Boneiru. “Hopi hende a reakshoná riba loke mi a menshoná siman pasa puntrando si nos ta sigur ku nos ta topa esnan ku a bai nos dilanti den shelu. Hende ta kere fásilmente ora e fayesé e ta yega serka Dios, pasobra Dios ta bon. Momentu un persona fayesé i bai shelu e ta topa e angelnan. ‘God is wel goed maar niet gek’, pader a menshoná. Hende mester hasi hopi esfuerso pa bai serka Dios. Mester traha duru,”entre otro pader Baak a menshoná durante predikashi. Evangelio di ayera Hesus a konta e disipelnan ku un dia lo yega fin na tur e kosnan bunita ku tin na mundu. Hesus a sigui bisa, Tene kuidou  i no laga niun hende gaña boso, usando mi nòmber. Boso lo tende di guera, rebelion i mas, sinembargo no spanta, pasobra hopi kos lo sosodé promé i esei no ta fin. Kos teribel ta bai sosodé ku señal grandi na shelu, entre otro tin skirbi den e evangelio, tin skirbi ku Hesus a bisa den Evangelio di Hesu Kristu segun San Lukas. Na final di Santu Sakrifisio di Misa pader a hasi orashon ku e pareha i a bendishoná nan ku awa bendita. Misa tabata animá pa Kor Flor di Coromoto.  

Share This
error: Content is protected !!