KRALENDIJK – Klousura siman di lesa buki na ‘Kolegio Strea Briante’ ku tremendo presentashon. Despues di e siman di buki ku e tema ‘Medio di Transporte’, Skol ariba menshoná a organisá un aktividat kaminda muchanan por a topa ku motosaikel i trùk den kura di skol. Fittipaldi Pietersz a keda aserka pa e por ta presentá na skol ku motosaikel pa e muchanan. Huntu ku dos otro persona Fittipaldi a hasi un paseo den kura di skol ku diferente mucha. Etienne Coffy di e kompania Don Andres tabata presente ku un trùk pa asina e muchanan haña informashon i el a duna un demostrashon di algun kos na e sitio. E muchanan a keda hopi kontentu i impreshoná ku nan por a haña e oportunidat pa wak un motosaikel hopi serka i hasi pregunta. Diferente mucha a hasi un paseo riba motosaikel, i a menshoná ku ta promé bes nan a sinta riba un motosaikel. E gritu di alegria di e muchanan a pone yùfrounan pidi pa nan por dal un trep riba motosaikel. Pa korona obra yùfrou Tibizai Sances di grupo 4B, a pidi pa e mes kore un motosaikel pa e muchanan wak. Un alegria inmenso a reina den kura di e skol. Yùfrou Jeanne Goeloe a bisa ku nan ta hopi kontentu pa por a sera e siman di lesa buki, ku motosaikel i trùk, un forma diferente. Rovien Pachunga a menshoná ku nos ta ehèmpel pa e muchanan i ta importante pa enkurashá nan pa hasi kos bon i korekto. Entre otro lesamentu ta hopi importante pa nan desaroyo. Distraishon ta bon, esta kore bai bin den kura di skol, sinembargo lesamentu ta kontribuí hopi mas ku desaroyo di un mucha. E kombinashon di potrèt ta ilustrá e aktividat den kura di e skol djabièrnè mainta, kaminda entre otro Surendell Martina, Fittipaldi i Rovienne ‘Pachunga’ Miguel.        

Share This
error: Content is protected !!