KRALENDIJK – Preparashonnan ta den ‘full swing’ pa atrobe tur mucha huntu ku nan mayornan por selebrá e fiesta grandi di yegada di Sanikolas i su ayudantenan. Un fiesta ku Komishon Sanikolas huntu ku Wedoe a bin ta organisá ya pa 2 aña i e aña aki e di 3 aña. For di na momentu ku Komishon Sanikolas a tuma e batuta for di Sentro pa Hubentut i Famia(SHIF), nos a adaptá algun aspekto di e fiesta, mirando ku tin gruponan ku no ta di akuerdo ku e historia tras di dje. Algun di e adaptashonnan ku nos organisashon a hasi ta entre otro kita e “roe“ kompletamente, pues niun pit no ta kana ku “roe” ni pa suta, ni pa spanta muchanan. Spantamentu di mucha ta estriktamente prohibí pa nos organisashon. E sakunan di pita ku e pitnan ta kana kuné, ta yená ku mangel. Pues bou di niun sirkunstansia no ta menasá ku lo hinka mucha den saku. E pitnan tin komo tarea pa entretené nos muchanan ku kanto, baile, kenshi i músika. Ku esaki nan ta demostrá diferente talento ku nan tin i no ta aparentá komo esun bobo. Pues debidamente Komishon Sanikolas a trese kambionan pa lòs e fiesta aki for di esun original ku nos a importá hopi aña pasá. Awor el a bira nos fiesta ku nos a adaptá, i e ta forma parti di nos kultura. E mucha ku ta gosa di e fiesta aki, no ta para ketu na ningun kolo den sentido di rasismo. Mas bien nan ta disfrutá di e alegria ku e fiesta ta trese i ta konsiente ku bon komportashon semper lo keda premiá. Tambe e fiesta aki ta enkurashá otro muchanan pa nan komportashon ta mihó.

Pa loke ta trate e aña aki, djasabra 23 di novèmber ta e dia ku Sanikolas lo yega Boneiru huntu ku mas di 40 pit. 10’or di mainta e toubot di KTK i diferente yate lo mara na waf Chicu Mercelina.

Diputado Nina den Heyer kompaña pa Miss Tourism 2019 Rayshantaly Coffie i LITO, e amiguitu spardó di tur mucha, lo yama Sanikolas i su pitnan bon bini i gradisí nan pa tei un aña mas aki na Boneiru. Despues di baha for di waf, Sanikolas i su ayudantenan ta sigui den un parada rumbo pa e lugá di stashoná outo patras di Misa San Bernardo, kaminda e selebrashon grandi ta tuma lugá.

Durante e parada, animashon lo ta na enkargo di grupo di brasbènt di mucha ‘Casa De Musica’, i grupo di brasbènt di pitnan.

Ora Sanikolas i su pitnan yega na e sitio di e aktividat, lo tin un tremendo show hinká den otro bou di kordinashon di Kalvin Thielman i Pito Agostien. Diferente talento di nos pitnan lo bini dilanti. Mas aleu lo tin presentashon di grupo di baile ‘Dreamgirlsz’, DC Rappers i Majoretten Korps Le Magnifique. For di 8’or di mainta por yega na e sitio, kaminda ta bai tin diferente aktividat pa muchanan. Kos pa kome i bebe, bounser, pinta kara i hopi mas. Te ahinda mayornan por manda nòmber di e yu ku hasi aña riba e fecha ku Sanikolas ta yega Boneiru, i e yu lo risibí un regalo riba esenario. Mayornan por tuma kontakto ku e organisashon pa medio di ‘Facebook’ bou di e página ‘Komishon Sanikolas Boneiru’.

Na final di e aktividat, Sanikolas i su pitnan lo drenta e diferente vehikulonan. Nan lo bishitá nos grandinan na Kas di Kuido i lo pasa den algun bario di Boneiru. E dia siguiente, djadumingu 24 di novèmber Sanikolas ta di bishita na Rincon riba plenchi di Fundashon Cocari. E aktividat ta kuminsá 1’or di mèrdia i ta terminá 6’or di atardi. Sanikolas lo ta presente entre 3’or pa 5’or di atardi na e sitio. Esnan ku no logra topa ku Sanikolas e dia anterior, por topa nan djadumingu den e bario di Rincon.

Un biaha mas e fiesta aki ta posibel danki na kada un spònser ku ta sostené e fiesta aki. E aña aki tambe e lista ta largu ya komo ku kada un su aporte sea grandi òf chikí ta di apresiá. Maduro & Curiels Bank Bonaire NV, Gobiernu di Boneiru, KTK Tugs, Jong Bonaire, Telbo NV, Silfam Cargo, Selibon NV, Aqua Adventure, Cruise Rental Bonaire, Avis Carrental, Stone Crusher, Fundashon Cocari, Fiesta Tours Bonaire, NOSTV, Artes Piedras BV, Top1Toys, Shoco Sabi, Jalvicar Carrental, Sektor di Kultura Arte i Literatura, Massive Production, Dichiri Services, Mac Enterprices, Havenkantoor, Kuerpo polisial, medionan di komunikashon i tur boluntario.

Share This
error: Content is protected !!