Diaranson, Prome Minister Evelyn Wever-Croes tawata tin su prome reunionnan na Hulanda bou
di su mesun peticion pa asina e haya e oportunidad pa splica tocante e situacion financiero di nos
pais. Prome Minsiter a reuni cu e Comision di Reino di Tweede Kamer. Tawata presente e
Voorzitter Paternotte, sr. Bosman, sr. Van Raak, sra. Antje Diertens, sra. Kuiken y sr. Bisschop.
Prome Minister a pidi e reunion aki pa duna un splicacion elabora di con e situacion financiero ta
na Aruba. Prome Minister a entrega documentonan cu cifranan pa asina cada un por wak pa nan
mes con e situation ta. Apesar cu nan a keda hopi satisfecho cu e splicacion y documentonan
presenta, Prome Minister a expresa cu asina mes e desconfiansa cu tin den cifranan di pais
Aruba, ta keda bin dilanti pa motibo cu nan a indica cu ta varios biaha for di e gobierno anterior,
nan a haya cifranan cu no tawata klop cu nada.
“Esaki tawata e maneho di e gobierno anterior cu a priminti y no a cumpli y lamentablemente,
awo ta e Gobierno aki ta carga e consecuencianan aki”, Prome Minister a bisa.
Otro topiconan cu a wordo treci dilanti tawata e situacion na Venezuela, Integridad y Refineria. Di
parti di e comision di Tweede Kamer, Prome Minister a duna di conoce, cu nan a keda hopi
contento cu e transparencia cu e cifranan a wordo treci dilanti especialmente e positivismo y
desaroyonnan nobo na Aruba. Mañan lo tuma luga e siguiente reunionnan, sperando riba e
reunion di Rijksministerraad diabierna awo.

Share This
error: Content is protected !!