Direktiva nobo di AFBW, d.r.p.d.Luthy Martines, miembro, Sherrel Kwidama, presidente, Mirella Walters, sekretaria, Bradly Wanga, tesorero i Dolfi Francees, miembro.

Djabièrnè 22 di novèmber 2019, fecha riba kua AFBW a kumpli 53 aña di eksistensia, e mishon ku a kuminsá 25 di sèptèmber, despues di fayesimento repentino di kompañero Nilco Rollan, kende a sirbi e sindikato pa 22 aña komo presidente, pa instalá mas rápido posibel un direktiva, a keda kumplí.Pabien ku boso CAO nobo i mesora mi kier partisipá ku aki dos aña ora mester negoshá un CAO nobo, lo mi no t’ei mas komo presidente”. Palabranan di Nilco Rollan despues ku miembronan a aprobá e CAO nobo na Mariadal. Poko e i nos den sindikalismo por a pensa ku ta di e forma di un fayesimento repentino ela indiká ku e lo baha komo presidente. Usibo a delegá sekretario Norwin Willem pa asistí e direktiva di AFBW pa yega na forma un direktiva kompleto statutariamente i tambe yega na un presidente nobo. Diferente reunion ku a keda tené primeramente ku tur shopsteward di e kuater kompanianan na unda AFBW tabatin representashon, esta Mariadal. Cargill, Bonaire Wegenmaatschappij i Fundashon Cas Boneriano a resultá den un komishon di trabou pa yega na forma un direktiva. USIBO ta sumamente kontento ku tur hende a realisá e importansia pa AFBW kontinuá. Konsehonan a drenta di tur kaminda, speshalmente di parti di e fundadónan i esnan di promé ora di e sindikato, manera Ewald Abdul, Eric Vlijt, Primu Bernabela i Lang Statie. E desishon a kai ku lo forma un direktiva temporal ku e tarea prinsipal di reorganisá e sindikato den tur su aspektonan i modernisá e statutonan. E logro prinsipal tabata ku banda di haña miembronan nobo, manera Luthy Martines i Dolfi Francees a logra ku sr. Sherrel Kwidama tabata dispuesto pa tuma e reto komo presidente di e organisashon. Den e siman aki e direktiva nobo lo tene su promé reunion ofishal, den kual lo bai na repartí tareanan i tambe presentá nan plan di trabou. Un konferensha di prensa tambe ta riba mesa, despues ku ofishalmente nan entrodusí nan mes na e gerensianan di e kuater kompanianan menshoná. Un punto ku e presidente nobo a trese dilanti ku lo ta guia den e reorganisashon ta kumpli ku statuto di e organisashon, tranparensha di e maneho i komunikashon kontinuo interno. Opviamente AFBW lo ta aktivo tambe komo miembro di USIBO.

Di parti di USIBO un pabien na e direktiva nobo i tur miembro di AFBW. Tin trabou, tin hopi asuntu pa atendé na interes i bienestar di trahadónan i miembronan di AFBW. E direktiva su so no por hasié. Ta p’esei un yamada na tur trahadó di e kompanianan pa afiliá na boso sindikato i hasié un organisashon fuerte ku ta pone ku dunadó di trabou ta respetá boso organisashon sindikal i ku AFBW por sinta na mesa komo partner igual na mesa ku e dunadó di trabou. Afiliá bo mes komo miembro i stimulá bo kompañero(a) di trabou pa e tambe bira miembro.

Oumento sueldo minimo

Entrante 1 di yanüari 2020 trahadónan ku ta riba sueldo minimo lo bolbe haña un oumento di 6.2%. Na 2019 tambe nan a risibí un oumento di 5% mas inflashon. Pues esaki ta nifiká ku e oumento a yega 11.2% den 2 aña. Ainda nos no a yega na e minimo sosial ku ta Usd. 1345.00 pa luna pa un trahadó soltero. Tin uninvestigashon andando ku mester keda kla na aprel 2020 pa wak ki espasio mas tin pa oumentá e sueldo minimo. Aki USIBO kier hasi un yamada serio na tur dunadó di trabou pa duna tur nan trahadónan e 5% ku nan a risibí komo rebaho riba nan primanan. E rebaho aki a keda duná ku e intenshon ku e ta pasa pa tur trahadó sin ku e ta oumentá e gastunan salarial pa e dunadó di trabou. Pues no tin ningun motibo bálido pa no traspasá e 5% aki pa tur trahadó.

Na e otro un banda partnernan sosial, esta sindikalismo, OLB, organisashon di dunadónan di trabo a firma ku sekretario di estado Tamara van Ark ku Ulanda lo bai hiba un maneho integral i struktural pa rebahá kostonan di bida aki riba nos isla. Esei lo konta pa gastunan di hür di kas, kamindá lo bin ku supsidio, miéntras ku mester tene gastunan di awa i koriente kontrolá Tambe lo oumená “kinderbijslag”, miéntras o bai bin un kontribushon pa mayornan pa paga akohida di mucha despues di skol. OLB na su turno lo por duna ayudo material, manera entre otro kuminda, pero tambe paga gastunan pa instalá pagabon i pa instalá bòm di gas di 100 liber. Transporte públiko grátis tambe lo por ta otro akshon di OLB pa nos rebahá gastunan di kosto di bida. Nos no a yega ainda i USIBO lo sigui kontribuí pa kombatí pobresa den nos komunidat pa asina nos alkansá un nivel di bida digno pa TUR hende riba nos isla.

Share This
error: Content is protected !!