DADDY BROKKE KU TRIUNFANTE REGRESO RIBA TARIMA DEN ‘CARIBBEAN CHRISTMAS GALA: NOSTALGIA’

Den Haag i Willemstad – E konosido kantante rubiano, Dhaddy Brokke ta hasi su regreso riba tarima durante un tremendo espektákulo navideño na Hulanda. Después di un korto ousensia fo’i farándula, Dhaddy, huntu ku un lineashon di kantante talento, lo deleita e públiko ku tremendo músika, i alabes trese nan den e ambiente di Pasku. 

Apesar ku mundu ta yena ku angustia i dolor, Pasku ta e temporada ku nos ta refleha riba nos humanidat. Un temporada unda ta refleha riba nasementu di niño Hesus nos redentor i ta duna bek na nos próhimo. Aki ta lubidá tur pleitu i pasa un ratu kontentu ku famia i amigunan. Nos gusta kome dushi durante e temporada aki, ayaka, ham di fornu, pekele, sult i varios otro plato sukulento. Aki, famia ta para sentral i tur miembro ta bini huntu pa kompartí regalo, inspekta e paketenan di Pasku i kome nan barika yen. 

Aunke e tradishon aki a mengua poko pa motibu di gastunan haltu, ainda e fiesta di lus, unda ta hinka e muchanan den auto pa bai wak e diseño nan kreativo di diferente bario i kompania. Tin gaita i aguinaldo na tur skina, anto no lubidá ku mester tende radio pa determina ta kua tambú ta esun ku a pone más drama den kaya. Anto tur hende mester bisti mane chokeke pa bai e tremendo fiestanan di Noche Buena pa después bai Misa di Aurora fielmente. Después tur hende ta pasa bebe un tiki sopi kayente ku pan será fresku serka e snék of panadería preferí. A final, e temporada di Pasku ta yena ku tradishonnan ku ta laga nos korda riba kas i famia. 

‘Caribbean Christmas Gala: Nostalgia’ Pa esnan ku ta biba na Hulanda, no desespera, paso durante e magno evento ‘Caribbean Christmas Gala: Nostalgia’, lo bo rekorda tur e sintimentu di Pasku akompaña pa e legendario Dhaddy Brokke di Aruba i e kantante di renombre Boy Thode fo’i Kòrsou. Lo habrí e anochi ku Duke Richardson i Melvin Landburg pa después e talentoso vokalista Clifton End & Tahir i su banda lo deleita un i tur ku mas bon músika. E banda Extazz lo será e anochi ku un ‘after party’ di kita sombre i e anfitriona di e extravaganza lo ta na enkargo di e estimada Paulette Smith. Pues no sinta den kas i lombra wowo, pero bin gosa ku nos durante ‘Caribbean Christmas Gala: Nostalgia’. 

Nos ta warda bo día 26 di desember 2019, di 17:00 – 22:00 na Event Plaza, Rijswijk. Pa mas informashon di karchi of pakete di VIP yama +31-6-50487919 of bishita www.janoviproductions.com. Tambe bo por manda un email na info@janoviproductions.com  Siguí BuzzBin riba ritnan sosial na e página di Facebook/BuzzBinProductions of mail na Media@buzzbinproductions.com pa más informashon

Share This
error: Content is protected !!